憎人富貴厭人窮乃人之常情，醫管局同市建局高層有得分花紅過肥年難免有人眼紅，《蘋果》日前報道市建局員工質疑高層減低層花紅自肥，該局行政總監林中麟呼冤，話二百四十個夥計中，有逾四成人獲發超過一個月人工嘅花紅，六成人獲八成月薪嘅花紅，有幾名表現好到加零一嘅員工，重有兩個月月薪花紅㖭。
林中麟又話有個別員工表現麻麻，因此今年冇花紅，新一年可能會調動吓崗位，「希望幫助佢哋有更好表現，唔好影響士氣」，林中麟指市建局以「論功行賞」概念分花紅，目的係激勵員工做好工作，至於高層人員分到幾多花紅，佢話係根據合約同個人表現發放，同基層員工無關喎。咁佢老兄今年分幾多花紅呢？市建局話佢哋透明度好高，遲啲會喺年報公告天下。舊年佢𢭃咗近一百萬元花紅，認真和味。
講錢失感情，林中麟最想同港人拜個早年，祝猴年同市建工作相關嘅各行業包括地產、建築同裝修都好景，市建局就更多、更快、更順利展開工作。
傳真︰2623-9278
電郵︰