今日是年卅晚，左麟右李明日便假紅館開騷，與逾萬觀眾一同喜迎猴年。趁在大除夕，譚詠麟和李克勤先吃個團年飯，並祝願港人忘卻憂慮，大家歡樂年年！
譚詠麟（阿倫）及李克勤這對樂壇孖寶，在羊年憑左麟右李演唱會唱到街知巷聞，明日是猴年大年初一，二人又在紅館開個唱與眾同樂，一起以歌聲來唱好新年伊始的香港。
由於左麟右李連日綵排個唱，故日前兩人特別抽空在將軍澳提早吃團年飯，六道菜式包括新春大盆菜、年年有餘、發財好市、鴻運大展翅、榆耳鼎湖上素及湯圓。
羊年娛圈堪稱多事之秋，明日踏入猴年，阿倫衷心希望香港能有大進步，他說：「最緊要個娛樂圈多番啲喜慶嘢，今年損失好多有價值嘅藝人，係好可惜。過去幾年，香港受到好多不利因素影響，受到好大衝擊，好似電影、唱片啲翻版愈嚟愈犀利，其實好慘㗎，真係要正視番呢啲問題。」
作為樂壇校長的阿倫揚言，希望自己在猴年可以「唞唞」，但卻永不言休，阿倫笑說：「我諗我如果唔做嘢嘅話，半年之後會變咗大肥佬，着T-back做相撲手呀，我會為自己嘅健康着想。我係想唞唞，諗啲新嘢出嚟。」
而克勤的想法也跟阿倫一樣，希望大家能夠忘記不快，他說：「舊年有人離開，的確係好難受，希望大家可以快啲唔記得，盡量向前望啦。」
克勤明晚要在紅館台板上度過大年初一，雖則新一年又要在工作中度過，但克勤卻忙得開心，他笑說：「開演唱會都係一年入面最開心嘅事，大家都可以一齊睇演唱會，開開心心咁過年。」
克勤在羊年奪取多個獎項，並蟬聯《勁歌金曲》總選男歌手寶座，他說：「舊年做嘢都好順利，攞到獎亦有好大嘅推動力，今年工作就照舊，愈忙愈好，至緊要身體健康。」
採訪：朱倬誼
攝影：陳志嵐
中國服提供：中藝國貨
