好友反攻，滙豐（005）50日線發揮支持力，股價見過120元即反彈，高收122元，加上長和同地產股生性，恒指回升85點收市。國企股亦係先低後高，指數由下跌133點倒升168點，睇嚟反彈未完。
兩隻重磅國企石油股都係先苦後甜，中石油（857）最低3.65元，跌破批股價3.7元，午後買盤殺到，推上3.9元高收，升2.6%。受正股帶動，兩件中石油Call輪打入10大升輪榜，9405升24%，9397升21%。
9405現價56仙，6月21日到期，溢價13.1%，槓桿率7倍；9397現價69仙，玩到12月30日，溢價17.2%，槓桿率5.7倍。兩件輪都係年期較長，溢價自然較高。唔想畀太高溢價，可揀9901，8月尾到期，現價1.28元，溢價1.5%，槓桿率有3.1倍。
港股交投興旺，今年又有好多重磅公司排隊上市，港交所（388）肯定豬籠入水，相關Call輪見低就要買。港交所有4件Call輪掛牌，最抵係9912，現價4.975元，5月初到期，已出現負溢價1.8%，槓桿率3.9倍唔算太細，其餘幾件槓桿率亦唔大得幾多。
章盛