能夠從創業板轉到主板的公司，通常都有多少本事，尤其係轉板之後，股價表現通常會好啲，最叻就係順手抽埋水，剛剛批完股的華翔微電子（1195）就係其中一個例子。
市場傳聞，維奧生物（1164）亦係其中一間有機會批股集資嘅公司，但估計未有咁快成事，話唔定要等佢公布埋全年業績。
維奧噚日公布與德國藥廠簽署合營協議，生產天然植物藥品，股價即上升4.6%，收0.68元，但相比舊年年中轉板後，在11月份的高位0.91元，仍然有一段距離，事緣當時維奧公布去年首三季業績，盈利有成4813.5萬元，大幅增長99.76%。若然最後一季冇乜意外發生，斷估全年業績應該好靚仔，到時就算維奧真係想配股集資，相信唔會好困難。
另外，日前經紀黃同經紀陳分別叫小初買大成生化（809）及威發國際（765），可以擺過年等食胡，點知噚日率先跑出，竟然係大成，真係令小初有多少意外。
慕容小初