坐喺屋企睇電視，大部份時間都係揸住個遙控器係咁㩒，呢度睇一陣，嗰度停一陣，有時發現一啲大陸嘅新聞報道或者新聞特輯，總會停多停，睇多睇，因為好多時候會有驚喜。
呢類報道性質嘅節目，離不開三字訣「真、深、淡」，「真」者真實感也，睇過一段打劫黨在公路上搶人背包，同黨企圖乘摩托車走人，警方在事主掙扎一大輪之後才現身追截，全程鏡頭雖然鬆郁矇兼搖擺不定，但極盡真實之能事，睇得個人好緊張。
「深」者夠深入也，曾看過一個關於黑市販賣受保護動物作食用野味，首先攝製隊深入餐廳之廚房，發現裏面像是奇珍異獸動物園一樣，差唔多噏得出口嘅有得擺入口，更衰嘅係奇珍異獸一般只係用嚟捧到客人面前騷畀客人睇，入到廚房無論客人點嘅係乜最後都係煮隻老鼠畀你食。
「淡」者係受訪者嘅態度，當某官員被問及是否知道某種動物是受到保護，他答：「知道」，再問他為何明知是受保護動物還要簽名作販賣用途，他答：「唔」，演繹手法淡過梁朝偉。
駭人聽聞的新聞不斷傳來，過期月餅翻新再造，未洗臭腳踩肉加超標化學成份製香腸，雙氧水浸魚翅，同埋聽到腳都震嘅人髮做豉油，求神拜佛千祈咪影到一樽樽已剝好殼嘅淨瓜子肉，原來係山區冇牙阿婆用口代剝，係就真係有排嘔！