佐藤江梨子首次擔正嘅動作科幻片《CutieHoney》終於完成，我羅拉見佢係改編自有名漫畫，又係動畫名導演負責，諗住又會有套令人目不暇給嘅大製作睇吓啦，但殊不知我一睇嗰條trailer，就好鬼失望，一句到尾認真粗製濫造！
我都明白套戲想令大家有懷舊feel，但佐藤出場顯威風時嘅煞食場面，淨係影住佢一步一步好冇台型咁行出嚟，重簡單過超人電視劇。而fans最引頸以待嘅佐藤裸體變身做「愛之戰士cutiehoney」嘅過程，冇錯好似《我係小忌廉》咁幾十條絲帶散開破繭而出咁，但齋以trailer所見，想睇吓佐藤嘅正斗身材個shape都難。而且佐藤啲皮膚真係好鬼差，做唔到嗰種又fit又驚豔嘅感覺囉！
反觀同佐藤打生打死嘅「四大癲王」啲造型就過癮得多啦，就連喺入面做佐藤老友、古板女警嘅市川實日子，都索過佢！希望呢條trailer真係只係預告啦，唔該個後期做番好少少，再唔係用電腦執執佐藤個樣都好吖！