無綫《2004年度國際華裔小姐》冠軍鍾嘉欣、亞軍曹敏莉及季軍洪巧玲噚日繼續去到各贊助商領取獎品，但噚日氣溫急跌，一班得獎華姐奔波勞碌領獎之餘，重要着住吊帶裙見人，真係戥佢哋凍。
由於今年華姐質素唔錯，所以無綫噚日已急不及待安排一班落選佳麗返電視城試鏡，重同林敬剛、李天翔做對手戲，被選中嘅女仔會喺今日參與由郭富城同曹敏莉主演嘅特約劇集《富豪海灣非凡情緣》，着三點式行天橋陪襯。
翻版常盤貴子8號徐靜潔對自己就冇乜信心，試鏡時雖然表情十足，但因為唔識講廣東話，始終都係蝕底啲，佢就用國語話：「我不會廣東話，多數都不會入圍，但可以和郭富城合作都會好開心，因為覺得他是漫畫中的白馬王子，如果可以見到他一定要帶相機合照和索取簽名。」
而吉隆坡3號楊
張可頤噚日喺將軍澳電視廣播城試造型，佢話早前到北京拍劇時，抽時間去咗上海探吳綺莉，佢話對方好享受做全職媽媽。可頤又話喺北京同佘詩曼拍劇時冇聽聞過對方會訂婚，佢重講笑話自己又冇匿喺對方床下底偷聽。咁傾吓偈啫，又唔使話到要偷聽咁緊要嘅！
陳煒早排同亞視《媽媽我真的愛你》演員去到珠海參加春節聯歡晚會，重喺台上合唱《真的愛你》呢首歌，陳煒話當晚有成六千名觀眾嚟捧場，佢話：「當晚氣溫只有七、八度，凍到死死吓，但啲觀眾仍然好熱情咁同我哋打氣，令到我哋好感動。」啲觀眾又跳又叫其實係咪為咗保暖呢！
Shine嘅徐天佑噚日到港台出席活動時俾人發現佢戴咗隻鑽石耳環，佢即時話係媽咪送嘅，天佑話：「呢隻耳環對媽咪好有意義，佢專登喺我整頭髮時拎畀我，佢話係心意嚟。」而黃又南自從做咗割瘜肉手術後，𠵱家日日朝早都會嘔一嚿血出嚟，但係醫生又話係正常嗰喎。嘩，日日嘔血，怕唔怕會失血過多呀。
關之琳因為簽咗纖體公司做代言人，所以早前又例牌俾人影到凸小肚腩出嚟嘅相。噚日之之同男友黃家諾出埠，佢經過悉心打扮，完全唔覺肥，不過佢兩個一見到有記者喺度，馬上刻意分開行，重乜都唔答就入咗閘。
