重有兩日就係大年初一，市民盡最後努力趕辦年貨，商場大業主就加強宣傳自己嗰場嘅特色，除咗吸引消費者過年前幫襯外，重希望春節期間市民都會嚟逛吓，感受吓新年氣氛。
好似地鐵嘅九龍灣德福商場，除咗1期有應節嘅桃花同水仙花裝飾外，重將2期嘅通道變身為如意坊，喺9個牌坊上寫上吉祥語句，而且重嵌入1至9嘅數字，認真夠心思。
那邊廂嘅新地，旗下多個商場安排咗「少林英雄賀新禧」表演，20位武林高手全部嚟自「河南省嵩山少林寺武術館」；武俠小說迷對少林武術想必神馳已久，真功夫𠵱家就有機會親眼睇到。
另外，太古就繼續宣傳鰂魚涌太古城中心商場，喺靈猴布置外，梗係唔少得桃花啦，棵「桃花祈福樹」高14呎，想要行桃花運繞樹走3圈要擇定時辰嘞。
近排樓市投資氣氛轉濃，唔少城中名人相繼入市。震雄集團主席蔣震嘅三女，即係前藝人蔣麗萍，就睇中咗鴨脷洲深灣軒，噚日連氣掃入8個單位，夾埋成2000萬，平均呎價要3891蚊。
以往較少見蔣麗萍入市，聽聞今次買入單位集中喺第一座中高層嘅E、F單位，642呎同埋643呎，諗住買嚟收租，估計月租1.1萬至2.2萬蚊左右，都有5至6厘回報，以今日銀行存款得咁少利息嚟講，唔少人都會覺得買樓收租係唔錯投資方法。
雖然過埋聽日先至到猴年，但近排樓市氣氛咁旺，長實噚日就喺喜喜洋洋氣氛下，提早同傳媒拜年。平時出名扮相多多嘅長實執行董事趙國雄，率領一眾負責賣樓嘅經理演奏中樂，包括彈二胡、吹笛、彈古箏同拉小提琴（怕者係中樂為體，西樂借用），扮相十足十近排熱到爆燈嘅「女子十二樂坊」。同場重有各代理行高層出席，慶祝長實今年頭炮新盤荃灣朗逸峰2期熱賣。
新正頭零售商都會畀啲折扣或者優惠買家，估唔到連參觀同租住酒店都有着數。長實嘅馬鞍山酒店海澄軒，喺新春期間推出20個月租單位，租金由6800蚊起，大送優惠招攬海外同內地駐港僱員。𠵱家連參觀酒店都有獎抽，贏取低至六折嘅美容纖體折扣券。
睇完後落實租住，月租最多可以平三成半；現有租客續租一樣有嘢送，就係美容現金代用券。
聽長實劉啟文講，商務駐港人員租住海澄軒嘅比例明顯上升，約佔整體嘅四成半。
商舖物業市場，一般喺春節假期前都會靜啲，但今年交投反常地活躍，連租約舖位重更加搶手㖭。噚日售價最高嘅佐敦彌敦道3相連舖，以4300萬賣出，𠵱家由3個租戶租用，回報近6.3厘。據講新買家為小巴大王馬亞木。
美聯倪金河話荃灣富華中心1樓3號，成交價3510萬，月收21萬，回報近7.2厘。另中原包國堯話，大角嘴道107至127號地舖連1樓全層，3500萬售出，月租22萬，回報率7.5厘。
蘭西
電郵地址：
