睇皇馬球星卡洛斯踢波一向係樂事，因佢既神氣又成日笑口噬噬，但係日前佢就既狼狽又面青青，因為對手係貝迪斯嘅祖亞昆！
喺左路惡慣嘅卡洛斯，過去同啲出名嘅右中場例如碧咸同文迪達交手都佔上風，不過記憶中佢喺西甲對住祖亞昆就冇啖好食，今次都唔例外。祖亞昆近個幾月真係弗到漏油，對皇馬賽前五場西甲又獨取四球。
卡洛斯今仗俾呢個西班牙國腳㩒到氣咳，更曾經要喺禁區踢低佢，好彩又冇判十二碼；再睇卡洛斯嘅面容罕有咁黑過墨斗，好徬徨，相信世上都冇乜邊個可以搞到佢咁。祖亞昆後來先拔頭籌，而皇馬中堅巴禾周不時要移至左路幫手，「鐵馬騮」今次真係面目無光囉。
交叉後腳斬波犀利
睇怕前晚深宵波友睇貝迪斯對皇馬嘅數目，會多過布雷西亞對AC，冇睇巴治奧演出嘅球迷都算走晒寶。呢位老將在場上強忍痛楚嗰份倒戈鬥心已抵讚，重有次交叉後腳斬波，令當年馬拉當拿嘅絕技再現。到佢被換離場就發晒老脾，唔知佢係怨自己嘅傷定唔忿氣教練調佢離場嘞。
車仔機會大
韋利響前日國米輸畀安玻里場波無上陣，令佢就被賣走嘅消息甚囂塵上。有指佢可能會過檔AC，但我求大俠覺得呢個鍾意四圍去嘅浪人去車路士嘅機會更大。一來佢響澳洲大，同意傳媒關係差，未必想留低；二來車路士有佢老友基斯普照應，真係投向車仔都唔出奇。
車仔重要拗波
伯明翰前晚就作客迫和車路士，中堅佩斯下半場同梅度一次爭波，打中後者塊面而爭拗。佩斯賽後重想去車仔更衣室同梅度理論，結果兩人喺球員通道相遇又互罵！我求大俠就覺得，車仔球員贏唔到波肯定心情唔好，佩斯無謂再去理論，搶到分咪算囉！
捧阿仙奴慶生辰
曾拍《與狼共舞》嘅美國影帝奇雲高士拿，近年銀色事業走下坡，但無礙佢喺星期日慶祝四十九歲生日嘅心情。嗰日佢專程搭直升機去睇阿仙奴對維拉嘅聯賽嚟慶祝！原來九○年奇雲高士拿到英國拍《羅賓漢》時，獲邀睇阿仙奴比賽，自始成為球迷，所以自己生日都揀捧阿仙奴場！