車迷期待已久，一直只聞樓梯響嘅賓利ContinentalGT豪華轎跑車，雖然令唔少準買家心急如焚，但礙於產量有限，未能一時間滿足從各地蜂擁而至嘅定單，惟車廠仍能從善如流，率先運嚟一部Pre-production嘅ContinentalGT到港，以解一班鍾情Fans嘅盼求；呢部被譽為全球至快嘅四座位轎跑車，一派凜然嘅風姿，果然名不虛傳，倒真有一份懾人嘅魅力。 記者、攝影：陳偉林
呢部令人眼前一亮嘅英國賓利ContinentalGT轎跑車，可謂係五年前德國福士集團，入主賓利以後嘅首部新車款。自2002年瑞士日內瓦車展上，首度展出ContinentalGT以來，至今全球收到嘅定單，早已超過4,000部過外，當中一班準車主，更不乏事業有成嘅商賈富豪，就連世界足球壇上萬人迷嘅碧咸，亦係ContinentalGT嘅準車主之一，可見當年福士集團給賓利車廠投放多達5億英鎊，確實係物有所值。
據知，新車設計總監DirkvanBraeckel及其40人嘅設計部門，響賓利生產基地嘅Crew總部，以五十多年前被譽為全球最快嘅四座位轎車──R-TypeContinental為藍本，花上四個月時間，以最新電腦科技模擬全車結構及裝備，糅合賓利轎車嘅傳統風格同現代氣息，難怪全新ContinentalGT甫公諸於世，便廣為傳媒及車迷所認同，旋即成為最受追捧嘅豪華轎跑車。
呢部四座位嘅轎跑車，車廂用料好講究，前後兩排真皮用料精挑小牛皮鑲嵌，而修飾用嘅桃木更屬千挑萬選下嘅上等素材，令人置身其中，感受有豪華轎車嘅出眾愜意感之餘，細微處重凸顯出賓利轎跑車剛性一面；四幅式真皮軚環，兩旁不僅有定速巡航、音響同免提電話嘅遙控鍵外，還有+/-轉檔嘅推桿㖭！
再者，一套6前速半自動波箱後方，重置有可調校高低及軟硬度嘅電子避震按鍵，以及有助穩定車身嘅自動升降尾定翼開關㗎！
引擎：5998ccW12DOHCTwinTurbo
馬力：560ps/6100rpm
扭力：66.3kgm/1600rpm
傳動：6前速半自動波，恒式四驅
懸掛：（前）雙搖臂
（後）多連桿
制動：（前）透氣碟
（後）透氣碟（ABS）
輪胎：225/40ZR19
PirelliPZeroRosso
尺碼：4807×1918×1390mm
軸距：2745mm
車重：2410kg
0-100公里：4.8秒
極速：318km/h
新車售價：$2,430,000
查詢：賓利香港（28901918）
新任賓利（Bentley）香港總經理嘅林猷強（SpanserLam），查實跟賓利甚有淵源；皆因佢未轉投新代理前，曾於舊代理商從事本地銷售及營運長達七年時間。Spanser唔止對銷售呢類豪華轎車有一手，原來佢早年更獲得多項被認可嘅汽車維修資格，對賓利呢類豪華轎車嘅結構同保養，可謂係瞭如指掌㖭！
Spanser對猴年嘅本地豪華轎車前景滿有信心，皆因賓利品牌早已深入民心，被認同係商賈名人至理想嘅代步轎車外，全線車款既講究又富氣派，加上最新面世嘅Arnage728Limousine，更會係至佳身份象徵；反之經由Mulliner部門以人手製作及裝嵌嘅ArnageLimousine，由訂車至交車最少需時約一年，擔心廠方會有供不應求嘅情況呢！
而ContinentalGT自面世以來，香港呢兩年嘅Quota早已訂購一空，每位買家最少要等一年，方能將之擁有；加上近日因英鎊滙價攀升關係，遲咗訂車的話，車價重有可能會調高至260萬㖭！各位賓利嘅忠實Fans，就真係有買趁快喇！
