國企指數噚日從底位大幅反彈逾300點，收報4737，升3.68%。有傳聞話，QDII將快落實，社保基金會先行一步，到香港或其他地方買賣。
由於國內春節假期比香港長，傳統智慧教落，新春之後例有中資流入香港炒中資股，問題只係多定少。以最近情況來看，港股及國企股在春節假期後，好大機會開個靚紅盤，噚日中資已有迹象偷步入市，等年初五開市時食胡，恒指收13253，升85點，成交縮至170.60億元。
香港不但破產數字下降，噚日公布嘅失業率亦持續下降，新一季失業率由7.5%降至7.3%。近期所見，招聘廣告正不斷增加，地產股表現咁靚，其實不無道理。事實上，現時樓按供款所佔家庭收入的比重，處於相當低的水平，只要份工有保障，唔使憂失業冇嘢做，香港重有大把人有能力置業，炒家亦開始入市掃貨。經過「八萬五」教訓後，相信港府日後唔敢再干預樓市，所以有歐資話，香港樓市將由一個極端，走向另一個極端，好容易會升到發晒癲。
樓市重會升幾多，阿虎唔敢講，不過成交激增則是有目共睹，就算樓價升唔起，地產代理亦大豐收，所以里昂話買樓不如買美聯（1200），美聯噚日又升8.7%，收2.50元。
有老行尊話，香港幾乎每隔十年就出現一次政治隱憂，現時香港談政改，唔知會否愈鬧愈大，資金隨時會因為政改問題而撤出香港，所以今年除咗係資金市外，亦係政治市。不過，以往香港出現移民走資潮，主要係因為香港人唔信共產黨，但現在香港人信中央多過信董建華，所以即使中央插手香港政改，亦唔會有太大反應。
阿虎