港股噚日低開高收，恒指升85點，連跌3日後終出現反彈，國企股彈力更勁，國企指數期指亦變番高水。
噚日國企好大波動，單睇國指，最低4436，掃番上4739，高低相差303點，結果收4737，大升168點，升幅3.68%。國企經營因素冇大變化，急跌後自然會急彈，大行同基金雖睇好後市，但國企短期是否已到底，仍待觀察，若彈完再落，去唔番噚日個低位，咁入市就穩陣好多。
重磅國企最靚係中石化（386），早段已唔肯跌，反彈之勢亦以佢最急，高收3.25元，升7.4%，亦係第一隻明顯轉勢的國企。中石油（857）早段落到3.65元，但午市掃得好勁，高收3.9元，升2.6%。
另兩隻波幅好大嘅係馬鋼（323）同江西銅（358），馬鋼由低位2.35元彈番上2.625元收市，反升0.1元，升幅3.96%；江西銅則由低位3.575元掃到上4.0元收市，倒升5.26%。事實上，今次國企跌得咁急，跌幅咁大，好似中石油跌成26%（最低位同近日高位比較）、江西銅跌33%、馬鋼跌25%，都係十日八日間嘅事，單係博反彈者嘅力量，已可以將股價推高十幾個巴仙。
內地地產股個勢真係好強，中國海外（688）收1.81元，升6.4%；華潤置地（1109）亦破位而上，收1.42元，升5.2%；北辰（588）亦升5.2%。越秀投資（123）重做緊支旗，阻力在0.95元，今次一突破，好快會見1.1元。
香港地產股一樣好強勢，大嘅穩步上揚，細嘅彈力更強，舊年聖誕節時推介滙漢（214），當時股價2.1元，噚日已上到3.1元，短短二十日，已翻咗半番，睇個勢上升目標3.8元，好快可以見到。
芬佬推介地鐵（066）同大酒店（045），果然有料到，噚日話隻數碼通可留意，佢哋𠵱家重一路收集緊，目標價在12元過外。無論係同本地或海外同業比較，數碼通嘅PE都係最低，加上經濟復甦步伐加快，電訊業經營環境好轉，下一個升浪，電訊股會好有作為。
由去年10月開始，數碼通走勢形成大圓底，阻力在9.4元，家下在9元水平整固，可先買一注，破位時再加注，短線最小量度上升目標係11.3元。
郭兆誠