不少讀者來電郵?信詢問：邊度可以買到貴姐（岑寶貴）嘅《猴年問阿貴》，其實左丁山已經答過：各大報攤有售，點解讀者重話買唔到呢？
今日接到德強記書報社行政及發行總監郭漢強嘅來函解釋。強哥云：「有關《猴年問阿貴》一書，初期由於書刊以卡通人物手法作為封面，很多報販誤以為是漫畫書籍，將書擺放到漫畫書類一旁，對銷售造成一定影響，為避免誤會，我們特別製作了三百個運程書宣傳掛牌，讓讀者留意。最近再作一次調查，發覺銷路理想，餘書不多，發行重點銷售方法，將書調到六個重點區域，依次序為：中東香港、旺角、油尖、中區、荃灣及東九龍，集中擺放。」
解釋夠清楚未？各位讀者未買到嘅，請自己到報攤再問吓，不過強哥講「中東香港」，左丁山真係唔多明，唔通係港島中區以外近灣仔銅鑼灣？農曆年前，運程書進入銷售黃金時間，過完年，報販就會回書，九個月後再賣雞年運程，呢類書越出越多，細啲嘅報攤根本唔夠位擺書，唔怪得一啲只睇封面，唔睇內容嘅報販，會將《猴年問阿貴》擺落漫畫書一類。
左丁山喺相熟報攤，可以拎一啲書揭開嚟睇幾頁，攤主話：「其實年年都係只得三幾本好賣，其他得個擺字。」據講，越遲出書嘅越好賣，至於邊個靈，要做吓「內容分析」（contentanalysis）先至知，新聞系學生大可以此為習作，就以「香港運程書內容及影響之研究」或者「運程書之市場及銷售策略」，寫番篇五千字論文，好可能攞A！