電腦教室：
年廿八電腦軟硬件齊齊洗邋遢

據傳統新年習俗，年廿八就要洗邋遢！又係時候大掃除兼洗白白，以煥然一新姿態迎接新一年，傳說這樣更有消災去病之效。其實家裏一年365日、年中無休嘅電腦，又何嘗不是要洗白白呢？軟、硬件兩方面維護得好，用起上嚟爽啲之餘，部腦都會襟用啲，等於同你荷包消災解難！

文：朱崇德　攝：梁細權
ImageGirl：Kaman（SunSpot）

電腦嘅工作效能不斷提高，唔好話淨係CPU，𠵱家連顯示卡都已經備有埋散熱風扇，所以電腦機櫳內所發出的熱力絕不能小覷；想部腦表現穩定啲，「清熱」工夫不可少，不過對於電腦新手講，可能會感到無從入手。其實只要幾個簡單步驟，便可減低機箱內之熱氣積聚。


除塵清熱大法

硬件篇

機箱熱氣頭號大敵
處理器可謂機箱內頭號熱氣之王，如果用上最新的XEON3.06GB，更是熱力迫人；可能你會話已加裝水冷裝置，或6、7把散熱風扇，不過電腦使用日子耐了，這類風扇或散熱器材就會愈積愈多灰塵，令散熱能力減弱，後果就係令系統因過熱而變得不穩定。讀者可嘗試用乾淨柔軟之水彩筆，輕輕掃走風扇上及CPU附近之塵埃，令熱氣能有效地抽走。如果家裏有吸塵機，建議離5cm的距離，邊掃邊吸，令塵埃唔會殘留在箱之內。

插卡亦應清理
除CPU是熱氣之王外，全機排第二位熱力四射裝置，首數顯示卡，如果是用上最新的GFFX5900或RADEON9800，發熱程度同CPU真係不遑多讓！用家一樣可以用柔軟水彩筆，掃走這些插卡、散熱片和風扇上之塵埃。另外其他插卡裝置，亦應該一併清理，如音效卡、Network卡等，最好就能連底板、硬碟、光碟機等也清理埋塵埃。

綑好電線保持暢通
清理好機箱內的塵埃後，就應該着手處理機箱內一團糟的電線。只要利用膠索帶，將各類電線、傳輸線綑紮好，就可以達到進一步疏通機內熱氣的作用，兼且將來要將電腦進一步升級，亦會方便好多。要注意綑紮IDECable時（灰色較闊那條），不要綑得太緊，或屈曲得太厲害，免致綑斷內裏之傳輸線，導致資料傳送不靈。

清理機櫳通風命脈
搞完內櫳，係時候執吓機殼。以一般電腦嚟講，機背之火牛風扇是全機的主要命脈，所以日常都應該積聚落唔少塵埃，清理方法亦同上文一樣。另外一啲唔係常用嘅插頭，如Serial、Parallel等最好都清一清，費事到有需要接上該類裝置時，出現接觸不良之情況。機前之光碟機及磁碟機邊位、機箱外殼則可以用乾布加少少清潔劑拭抹便可。

清潔周邊裝置
雖然買個新Keyboard只係一個數十元的問題，不過如果自己郁手清潔的話，一來夠環保，二來有讀者使用較貴嘅無線Keyboard，好難隨便換掉吧！讀者只需要用一般開水，加入極少量之清潔液，以百潔布拭抹便可（最好用海綿面那邊，唔會弄花Keyboard表面）；但大家要注意百潔布一定要扭得夠乾身，雖然咁會加長拭抹的次數，但太濕的話，清潔液會流入Keyboard之內，令按鍵失靈，大家一定要切記！

軟件篇

第1招　桌面檔案歸類清理
零亂嘅電腦Desktop，同一張放滿雜物嘅書枱一樣，令人成日搵唔到需要的工具之餘，亦會降低工作效率；其實在電腦Desktop放置大量文件、數碼相片及文件夾，是一樣會直接佔據電腦運算能力的資源，白白減慢電腦的運算能力；其實現在的硬碟機動不動就上30GB或以上，如果有做「硬碟分割」的話（例如D:\），應該將文件、數碼相片、MP3及Video檔案，移送至D:\之內；如果想使用方便啲，亦可以為他們在桌面建立捷徑。
另外，大家亦可花一些時間，將一啲已經唔用嘅程式及桌面捷徑剷走，從今養成有系統地安裝軟件及使用電腦嘅習慣。

第2招　刪除暫存檔案
想清理一啲唔要嘅檔案，同過時唔用嘅舊程式，幫部電腦搞大瘦身，其實WindowsXP已內置有這類清理程式，大家只要在啟動（開始→所有程式→附屬應用程式→系統工具→清理磁碟），清理工作就會全自動作業！
另一個日積月累，不斷佔存硬碟空間的頭號敵人，就是「C:\windows\temp」這個資料夾，因為裏面會存放着好多暫存檔及其他冇用File，而這類檔案名稱多數以（*.TMP），大家只要從「我的電腦」直入這條捷徑，並將裏面所有檔案清除，就完成了這個清理。

第3招　重組硬碟分布
將一切多餘檔案清走以後，就應該為磁碟機做重組程序。因為硬碟經過多次安裝?反安裝程式、檔案移動或清除之後，會出現好多斷斷續續的區堿，這會直接令硬碟磁頭搜尋時間增長，間接縮短硬碟壽命。方法好簡單，只要打開C:\，再右擊滑鼠選「內容」，便看到重組磁碟之工具。
一切辦好之後，部機係咪行得又快又爽呢？建議大家可以一樣在「系統工具」內，選擇「系統還原」工具，並以此「建立一個還原點」，第時部機有乜問題，都可以回復番𠵱家呢個最佳狀態。