大陸「法律專家」口水蕭發炮，噚日喺港台又再打橫嚟，叫囂話去年七月一日五十萬人大遊行，唔代表民意主流要求普選，又話元旦日得嗰十萬人遊行，喺六百萬市民之中又佔幾多？
照口水蕭咁講，即使有一日六百萬人個個都要求普選，佢都大可以話：大陸嗰十三億人反對香港普選。六百萬多，定係十三億大？呢啲就係共產黨砌詞狡辯嘅終極方程式。
到時，至於十三億人係咪真係個個反對香港普選？你叫大陸，不如全國公投，表達吓十三億人嘅意願？到時，佢就換成套軍裝，出動坦克，宣布戒嚴，直情講都無謂講，用暴力嚟解決。
台灣就有個海峽隔住，香港就同佢黐到實。最終，胡溫一聲令下，斷水斷糧，停運豬肉（雖然啲豬肉都可能唔係咁衞生），即是一鋪大晒冷，到時香港人，係咪夠膽玩到咁大？
共產黨嘅性格就係咁。口水蕭又唔問吓佢後面嗰個政權：冇錯，香港原本都唔係咁多人要求一定要普選特首，之不過，鬼叫老江欽點咗個董廢柴做傀儡，六年幾以來，搞到香港鬼五馬六，自己眼光奇差，搞到要不斷填氹，今時今日，又惱羞成怒。冇普選？好呀，咁咪一直屍爬輸血，繼續貼錢磅水囉。香港變到同大陸一樣，慢慢陰乾，鄧小平當日收回香港，不知自量，今日遭受歷史嘅懲罰。
口水蕭喺度依牙裂嘴，跟住周梁加把口入嚟反對普選，話應該保持功能組別，直至呢個政府有能力管治為止。梗係喇，周梁靠功能組別食胡，冇咗功能組別，即是牛津劍橋大學取消第三世界嘅富豪靠捐錢送仔女入學嘅慈善配額，要憑實力同當地鬼仔一齊考入學試，比拼英文同智商，咁又邊有咁多億萬富豪啲仔女，今時今日入到牛津劍橋？
立法會一旦普選，周梁一類人從此就要退出政界，冇得撈咁又係慘啲嘅，所
不過，好似李國寶咁，人哋一樣係有錢仔，佢唔會怕直選。李國寶笑笑口話：不如call晒班草委出嚟，講吓當年寫《基本法》嘅過程吖。
郁吓就叫班草委出嚟做證，過得三五年，好似安子介咁，包括蕭蔚雲在內，分分鐘死得一大半，剩番一兩個，唔係唔郁得，都有埋柏金遜症，想要重新了解《基本法》原意，咪要未雨綢繆，今日好請定一個問米婆stand-by？
草委作古一個，就少一個，《基本法》好快就有如聖經嘅「死海手卷」，變咗一本天書，冇人睇得明，冇人解得通。呢嗱，後生啲嗰個更勇，就自認係矇查查，話唔係太了解香港嘞。
死無對證，連不知所終好耐嘅周南，亦捐個頭出嚟，話死鬼老鄧講過，一人一票選唔出啲「愛國者」，所以鄧小平都反對直選。
不過，有一個重未死，就係趙紫陽。佢喺一九八七年，以中國總理身份，寫過一封信畀港大學生會，白紙黑字咁話：「香港將來按照你們所說的民主治港，是理所當然的」。注意，係「你們所說」，唔係「蕭蔚雲所說」、「胡溫所說」、「人大常委會所說」。
趙紫陽呢封信，今日重喺度，不過可惜趙紫陽自己都已經玩完。佢當年一樣鼻哥窿向天，問香港記者：「你們擔心甚麼？」共產黨講嘅說話，都信得過？豬乸都會上樹，蕭蔚雲都會變楊利偉，飛咗上天咯。
傳真︰2623-9278
電郵︰