過完新曆年，春茗之類活動開始多，八方幾乎日日都唔得閒。剛剛接到貿易發展局嘅請帖，佢哋定咗下個月六號春茗，地點就梗係喺會議展覽中心。
雖然忙，但今年八方一定要抽時間去捧吓施祖祥場，事關今次應該係佢以貿發局總裁身份搞嘅最後一次春茗，之後就退休歎世界。八方聽聞，佢嘅接班人本來喺內部搵，而且有人選，不過最後冇咗下文。點解，應該最後一關卡住。𠵱家又揀過，施公恐怕要做多一陣。
沙士一役之後，旅遊零售冧晒，大家先知貿易至係香港真正支柱（吳光正主席都係咁話），所以貿發局地位更形重要，總裁個位，前有蘇澤光、現有施祖祥，珠玉在前，繼任人實在好大壓力，何況又要湊得掂吳主席呢。
傳真︰2623-9278
電郵︰