今日年廿八，唔知大家洗咗邋遢未呢？年年都用碌柚葉沖涼，好悶啫，不如今日搞搞新意思，去川龍用潔淨嘅大帽山山水象徵式洗洗手，沖走羊年霉運，攞番個好意頭，遊山玩水都可以應吓節，預先感受新年氣氛。
記者、攝影：陳震霖
模特兒：Fun、Yvette（Space2）
喺川龍搵條山溪唔難，不過𠵱家正值深冬，溪水無雨季咁充足，走勻川龍上下，洗手靚位只得一個，記住咯噃，端記茶樓對開有塊大菜田，菜田入口有條石橋，橋底水聲潺潺，山溪流水量豐富，因為菜田位置喺大帽山山腳，地勢較平，山水集中自然水頭充足。
唔好睇小呢啲山水呀，村民引山水種出嚟嘅西洋菜、生菜、黃芽白，特別爽口彈牙，好多人都特登揸車入嚟買番三兩斤，附近間「彩龍酒樓」重用山水泡茶㖭，老夥計賣茶讚茶香：「大帽山石澗山水，泡出嚟嘅茶清甜郁香，飲完齒頰留香。」Yvette整番壺普洱，飲一啖，大讚：「入口順滑，喉嚨好舒服。」
歎得茶，唔爭在食埋一盅兩件，各式點心每碟$10至$15，茶樓採自助形式，無夥計幫你落Order，唔該自己埋蒸籠昅昅，睇啱邊碟就攞邊碟喇。撞啱星期六、日，茶樓重有正宗山水豆腐花（$10）供應，唔試係你嘅損失。
彩龍酒樓
地址：荃灣川龍村2號地下（24143086）
邋遢洗完，茶又飲過，食飽有氣有力，不如去響石墳場搵響石，沿「彩龍茶樓」側邊條小路上行30分鐘，見漁農自然護理署川龍管理站，再往上走10分鐘，見天主教墳場，分叉路轉左，見避雨亭，亭右邊有一排矮樹林，響石就喺附近嘞。
講真，嚿嚿石都咁上下，要逐嚿石敲吓先知堅定流，好考你耐性，不過難搵先過癮嘛，Yvette好彩，敲幾嘢就搵到響石，橫睇掂睇嚿石同其他石頭無分別，一敲居然發出類似金屬撞擊嘅「咚咚」聲，好過癮。
落番山，意猶未盡，不如行埋大運至好走，川龍有條多功能迷你家樂徑，行晒全程只需15分鐘，最高點有觀景台，遇天朗氣清，視線可及最近嘅藍巴勒海峽、青馬大橋，眼力好甚至睇到南丫島、大嶼山；沿途有唔少金屬傳意牌，介紹川龍一帶常見樹木；有興趣嘅話重可以玩埋沿徑嘅健身設施㖭！
睇怕今晚你都要返屋企食團年飯，係時候要走嘞，臨走唔該打電話問吓阿媽買齊餸未，未嘅話不妨幫襯王大姐，王大姐每日打理大菜田，種嘅新鮮西洋菜，全部引大帽啲山水灌溉，摘番三兩斤返屋企，整番碟真正郊外油菜，都咪話唔盞。摘？點摘先？$10換1個背心膠袋，你要幾多就親自落田摘幾多，當然摘夠就算，唔好浪費王大姐啲心血！
今年想行番個桃花運？又得啫！荃錦公路北行5分鐘左右，過咗廢車場就會見到秋記桃花，雖然呢度桃花唔算多，但勝在唔似得市區花市咁要迫餐死，老闆叫冼伯伯，勁好人，三唔識七都可以傾餐飽，重教你點樣打理桃花㖭，桃花價錢由$380至$1,380不等，貴定平見仁見智，不過好就好在有得討價還價，有心買唔好怕醜，記得講價呀。
秋記桃花
地址：荃灣川龍圳下村6號（24927537）
