大戶上周㩒住滙豐（005）嚟砌，加上多家公司開動抽水機，國企咁啱又腳軟，港股氣勢確係弱咗。不過，大市有健康調整，才是好事，否則又怎有平貨可買？
美股上周五走俏，杜指以貼近全日高點10600收市，納指升幅更大，達1.5%。美國上市公司開始陸續公布業績，英特爾、IBM、通用電氣同Juniper等大公司，成績表都好靚，足證經濟復甦乃貨真價實，若趨勢持續，美股港股想唔升都難。
有誰比公司主席更了解公司、更清楚公司的前景？冠軍科技（092）主席簡文樂自02年3月以來，一直都增持公司股份，過去一個月來，簡文樂又4度增持，合共1900萬股，最近兩次的買入價由1.66元至1.73元。
上月初冠軍先舊後新配售1.123億股，每股1.61元，AeneasCapital接去7000萬股（耗資1.13億元），佔有冠軍擴大後股本7.4%；瑞士信貸集團持有5537萬股，佔5.8%；簡文樂增持後，佔32.07%。
Aeneas未被起底，但以一間資本管理公司，肯投資逾億元落一間科技公司，來頭應該唔小，也可見Aeneas對冠軍的信心。配股後，冠軍股價走軟，到近日始回升。兩個月來，冠軍走勢形成頭肩底，頸線在1.76元，一衝破便要追進，以量度升幅計，短線目標指向1.98元。
若睇長點，過去一年半，冠軍走勢形成大型圓底，呢個係典型的收集形態，02年5月的高位2.0元有阻力，若衝破，則大圓底確認，中線上升目標為3.0元。
冠軍見3.0元，其實不難，因為佢嘅業績提供足夠嘅動力，呢類基金股，可以牛皮收集好耐，時機一成熟，一起步，股價隨時可翻一番。
先講業績。04年度（6月年結），估計再無減值撥備（上年度之數為1.26億元），或撥備降至一個低數字，盈利可上升78%至3.4億元，每股加權盈利40.6仙，股價3元，PE亦僅7.3倍。
重有兩點，就係冠軍近半年股數雖增加37%，但每股資產淨值（攤薄後）仍高達3.9元，現時股價大幅折讓逾55%！另外，冠軍5送1窩輪，本周二除淨，窩輪有價，但冠軍有盈利支持，可能「係咁意」調整一下，又再升過。除淨前入市，可望財「輪」兼收。
郭兆誠