美聯物業老細黃建業近排高調掃豪宅，中原集團主席施永青可能俾佢刺激，啱啱一次過買咗三個何文田嘉多利豪園貨尾，盛惠一千八百萬。負責呢單大生意嘅地產代理，竟然爆冷唔係中原，而係利嘉閣，雖然兩間公司都係施老闆嘅，不過話晒中原都係佢一手一腳創辦嘅親生大仔，利記只係買番嚟嘅細仔，冇理由有生意唔益大仔㗎？
利記九龍豪宅高級區域經理林松偉解畫，早前發展商嘉華地產畀咗段獨家銷售期佢哋，雖然已經完咗，但係佢同另一位同事曾令智都覺得，個盤投資價值高，決定游說老闆施永青掃番幾件，上個禮拜六凌晨捉住佢傾，終於半夜促成交易，重一口氣買三間，盡顯老細風範，三個都係高層單位，面積九百幾至一千三百幾呎，平均呎價五千六百蚊，全部買嚟長揸收租。
睇嚟施老闆作風實事求是，唔會偏心，反正向發展商收嘅佣，到最後都係落番佢個袋，邊個仔做到嘢就幫襯邊個，一視同仁。
赤柱富豪海灣近排銷情凌厲，差唔多日日見報，不過發展商可能覺得重未夠，搵埋名人買家合作做吓騷，點知名人臨時甩底搞唔成。話說蒙妮妲集團董事長鄭明明最近入咗間富豪海灣，發展商原本約咗成班記者，去機場採訪專程由上海飛嚟香港簽約，跟住轉頭上飛機返上海嘅鄭明明，呢場簽約騷原本幾有噱頭，可惜最終因為鄭明明臨時落唔到嚟而報銷。
中原地產最新物業報告預測，因原材料價格上漲，推動樓價上升。今年內地普通住宅供應量不斷增加，但需求同步上升，所以價格預期會繼續向上；城市邊沿區域以至郊區住宅交投暢旺，樓價梗係上漲啦！除北京同上海郊區極具發展潛力，成都同瀋陽都發展得好快。
高檔公寓好似北京同上海，因早幾年供求失衡，𠵱家需求增長開始放緩，二線城市就重消化緊。咁睇樓價都冇乜機會大升嘞。
別墅市場就因為政府暫停審批關係，雖然發展商手上嘅土儲重開發緊，但因為市場吸納量都唔弱，所以整體前景樂觀。
豪宅大旺，上個禮拜截標嘅淺水灣南灣道十五號大屋，已證實由一位專業人士以接近一億元承接。據做成單生意嘅中原何兆棠講，大宅新主人貪間屋個車房可一次過泊十部車。
物業地盤面積超過一萬一千呎，現狀由主及副樓組成，主樓面積近五千呎，副樓逾二千三百呎，重有近七千呎花園。行內人士話，大宅擁獨立地段，有重建價值，可建地積比率零點九倍，洋房面積最大可達一萬呎。
南灣道十五號原屋主係建材業務恆威集團主席劉旺。
𠵱家樓市變化好快，發展商為賣到樓，就要迎合買家需要，提供單位要好有彈性，即係話買家要兩房戶，就畀佢揀，要三房有三房，要相連或複式都要冇問題。
蘭西聽聞有啲發展商為投買家所好，做定幾手準備，入則時入幾款，政府批咗就擺喺櫃桶底，用最基本嗰隻則，到有買客提出特別要求時，就攞番出嚟，咁就可以滿足唔同嘅買家啦。睇嚟𠵱家發展商真係醒少啲都唔掂。
蘭西
電郵地址：
