記得細個嗰陣，爸爸曾經對我講過：「男人最緊要搵到一百萬，當搵到一百萬就可以放喺銀行做定期，咁樣每個月就差唔多可以有一萬蚊息，夠一家人基本生活費。」一直將呢句說話緊記於心，直至最近銀行將息口調至0.001厘，計計條數，即係一百萬存款每個月十蚊雞息都唔夠，嘩，我頂！
銀行的理財顧問坐在對面，細心地解釋形勢，並提議我如何將雞碎咁多的存款分散投資，「嗱，可以選擇穩健或者進取兩種不同的投資策略，」唔，「穩健」和「進取」，用字多麼踏實，「當然可以選擇買個別股票，但若然怕買得太單一的話，不妨考慮投資基金，這一款的主要成份是恒生指數股，那一款則是國企指數股，看你較睇好香港或大陸的經濟前景而選擇吧？」哪有資格或眼光去睇好香港或大陸的經濟，所以沒有甚麼表示，顧問以為我有猶疑，於是繼續介紹：「重有好幾款可以考慮，呢款就集中投資喺東南亞，呢款就集中投資喺北美洲……」顧問非常細心地逐項介紹，但其實自己則有點神遊太虛，一味望住單張上標準普爾個名，點解咁大吉利是會叫做「貧窮」。
「谷生，考慮成點？」「係咪就咁放喺銀行，一個月真係得幾蚊利息？」「係。」「咁麻煩你盡量幫我搵啲穩健啲，求其多過銀行啲息就得㗎嘞，搵錢真係好辛苦。」「問題應該唔大，谷生你都識計啦，一百萬存款，一個月先得幾蚊息。」「咁又係！」