碧咸日前透露原來佢左右腳長短不一。連萬人迷近乎完美嘅身軀都有少少缺陷，大家有冇突然覺得，原來上天重係公平呢？我求大俠十幾年前睇過部叫《長短腳之戀》嘅電影，唔知廣告商同埋電影商有冇興趣利用碧咸呢個「天賦本錢」，搵啲搞作賺番筆呢？
碧咸自爆原來佢隻「黃金右腳」係長過左腳，而佢多年嚟效力曼聯都唔知呢個事實，直到季初加盟皇馬至有隊醫話佢知。碧咸後來試過塞鞋墊想平衡番，不過因為唔舒服最後都放棄。點都好，以佢咁受歡迎，大家當然唔會當係咩一回事，不過我就想知，佢射罰球咁醒，唔知同長短腳有冇關係呢？
最新收到料話湖人「三條A」傷兵：奧尼爾、拜恩同馬龍起碼要唞多一個禮拜先可以復出，老將馬龍更加要最少唞多兩個禮拜㖭。我求大俠真係估唔到佢哋嘅傷勢原來係咁大鑊，連積遜教練都講明要到明星賽之後，湖人先至可能全面恢復元氣，湖人躉近排都係咪亂捧囉！
NBA今季其中一支「主場贏盤王」爵士，噚日喺主場對作客勁唔掂嘅騎士，竟然爆大冷，十四年嚟第一次輸波，唔通真係長路有盡時？睇嚟爵士嘅主將之一夏培寧最近傷咗，好可能要整季長唞，對爵士嘅火力真係有影響，睇嚟佢哋之後嘅主場勝率好可能會回落。
前晚英甲球隊鬥演入球騷，全日十二場波共產生五十四個入球，平均每場入四點五球，係單日英甲球賽嘅新高。齋講諾域治和洛達咸四比四，同埋連互射十二碼都難見嘅葉士域治勝克魯六比四比數，真係夠嚇人。英甲波周不時就出現大手交易，大家以後貼英甲波膽真係可以盡情啲。
拜仁龍門簡尼嗰兩隻手撲盡天下前鋒嘅射門，但講到用對手揸車喎，認真水皮。話說佢舊年揸車爬人哋頭時被判危險駕駛，又喺短時間內幾次俾人影快相，早排終於被吊銷牌照。有報道引述德國交通部人士嘅話，有人認為簡尼有輕度弱智，話冇人會咁揸車喎，係咪咁誇張呀！