今日係年廿八，人人都掛住大掃除，相信唔少炒家亦已經收爐，小初都唔諗住短炒，想搵吓有乜嘢股票可以揸過年。
上個星期，經紀黃叫小初留意大成生化（809），而愛冒險如小初的經紀陳，就建議小初買威發國際（765），皆因佢知道有人會不甘寂寞。
過去兩年，當基金追捧小型工業股之時，可能係威發業績唔算特別靚仔的原故，始終冇乜成交，直至舊年年底，威發公布以1500萬元，收購一間玩具消費品公司後，股價至開始異動，而且隨即搞埋批股集資，以先舊後新方式，每股0.68元，配售2100萬股，集資淨額1370萬元。
經紀陳話，批貨嘅金額咁細，真係一個炒家仔都可以食得晒。實際上，威發批完股之後，股價一直企得好穩陣，企在配售價之上好多，好似上周五股價雖然跌2.33%，收0.84元，仍較配售價高好多而且成交好細，只得150萬股，金額129萬元。睇威發嘅表現，似係接咗貨嘅大戶尚未出貨，仍然可以博一博，等人哋開車。
慕容小初