恒指上周回跌，淡友主攻隻滙豐（005），個別大藍籌仍有好表現，只要市況回穩，呢類強勢股又會開快車。
太A（019）係強勢股之一，上周最高見過54.25元，周五跟市調整，收53.25元，1周仍有兩蚊進帳，升幅近4%。
太A最近3個月形成圓底走勢，上周正式突破，短期或有後抽，若見股價回至52至52.5元，可以揀件太ACall輪玩吓。
目前有4件太ACall輪掛牌買賣，9005同9176都係鎖定回報輪，要搞清楚條款先至好玩。兩件標準輪9660同9372，前者已屬末日冇成交，主角自然係後者。9372現價66仙，今年6月中到期，溢價4.2%，槓桿率8.1倍，數據合理，等6毫子邊邊郁手。
滙豐近周變弱勢，大摩等幾家大行努力唱淡，但亦有幾家大行唱好。淡友質住隻滙豐出擊，暫時取得甜頭，你估好友會否蹺埋雙手？
大笨象50日平均線目前在119.8元左近，同上周五收市價121.5元相距不遠，應該守得住，或至少有反彈，滙豐Call輪可耐心收集，對象依然係9157同9136。
章 盛