新車速報：<br>平治C200KSportsPackage裝備更齊

新車速報：
平治C200KSportsPackage裝備更齊

平治代理繼2003年初，引入全新換裝有1.8公升直4Kompressor機械增壓偈嘅C-Class後，臨近羊年結束前，又引進配備有SportsPackage嘅C200K特別版；既有齊跑車避震、制動同專用合金胎軨外，還有專用跑車椅及配套設備，加上代理特別加裝嘅Bi-Xenon頭燈連泊車感應器，惟車價亦不過32萬上落，又真係幾吸引噃！

記者、攝影：陳偉林　ImageGirl：Cody　
服裝提供：ZealRhythm

德國平治C-Class，向來響中價歐洲車市場上，一直有唔錯銷量，而且每有新車系面世，更成為世界各大車廠爭相模仿嘅對象；當中，雙連橢圓車燈、前衞嘅門邊電鏡連方向燈組合，還有嶄新富立體感又易看嘅三角尾燈編排，更成為繼後不少車廠新車嘅標準裝備㖭！

■鴨尾狀車尾別具穩壓作用，而LED高置煞車燈重倍添安全感。

■改換大口徑尾鋼喉後，可提升引擎中、高轉反應。



SportsPackage造型出眾
然而，喺一眾同級歐洲車款中，廠方棄用傳統自然吸氣引擎，又或者配置有渦輪增壓嘅Turbo偈，改而選用機械增壓嘅Kompressor引擎，皆因結構簡單，輸出夠線性之餘，重勝在低轉扭力強勁㗎！正如早前車廠以一台1.8公升偈入替原有C200K嘅2.0公升型號，惟性能表現相同。
然而，講到外觀嘅吸引性，相信一眾C-Class車款，好難會及得上呢部SportsPackage特別版喇！事關佢有齊四輪17吋專用合金胎軨外，重有大口徑尾鋼喉裝置，加埋代理追加嘅Bi-Xenon頭燈，以及泊車感應裝置，單係一副惡形惡相嘅包裝，經已教人有一份凝聚魅力。

■除換裝17吋合金胎軨外，重內置鑽孔碟及高效能活塞卡鉗，有助制動演繹。

■新車追加Bi-Xenon頭燈，格外出神吸引。



跑格鮮明享受全面
講到座艙，屬Classic版嘅C200K型號可謂無甚瞄頭，惟新加入SportsPackage配套後，既有前排專用嘅SportsSeat連駕駛席電控功能，又有三幅式真皮跑車軚環跟多功能遙控鍵，以及真皮波棍的同金屬跑車腳踏，加埋原車左右獨立恒溫冷氣連過濾裝置，又有10碟CD高級音響，還有不可或缺嘅前後6個安全氣袋連充氣簾幕裝置，享受高級之餘重別具跑意呢！

■前排屬貼身嘅SportsSeat設計，另駕駛席備有電控調校功能。

■座艙寬敞之餘，重有高級桃木修飾，烘托有多一份豪邁感。



強化懸掛制動表現出色
新車沿用一台1.8公升直4DOHC機械增壓Kompressor偈，匹配5前速半自動波，有唔錯輸出及低轉扭力充沛嘅特性，加上專有SportsPackage嘅四輪跑車化吸震筒裝備，還有度身訂做嘅原廠高效能鑽孔頭迫力碟及卡鉗，再配合埋四輪大口徑嘅17吋合金胎軨，明顯中、高轉表現強橫外，重演繹出唔錯嘅循迹性及對地抓着力㗎！加上車內備有主動ESP，又有ABS連BAS裝置，重別具可靠安全感㖭！

■後排空間寬敞闊落，兼備有獨立頭枕組合，乘坐倍見舒適愜意。

■大型首飾箱內置CD匣，換碟倍感輕鬆自在。

■中控台有齊恒溫冷氣及高級音響，隨手可及。



記者評語：表現更見跑車化
新車特別加裝有全套SportsPackage，既有四輪專用17吋合金胎軨，又換裝有最新Bi-Xenon頭燈配搭，還有聲亮雄渾嘅大口徑尾鋼喉，賣相攞滿分之外，前後兩排Sports座席及配件，烘托得跑意盎然之餘，重有跑車化制動連懸掛，可有助操控反應變得更靈敏踏實呢！

■新增三幅式跑車軚環兩旁，重置有多個遙控按鍵。

■換裝有真皮波棍的，質感充實轉檔又利落。

■編排井然嘅表板設計，資料豐富又易看。

Cody評語：造型跑格鮮明突出
除車頭一對炯炯有神嘅車燈作配襯外，四輪大口徑跑車合金胎軨，亦見跑格鮮明突出；當中，座艙陳設講究配備齊全，置身其中享受寧靜環境下嘅音響演繹，重予人愜意舒適感㗎！

平治C200KSportsPackage規格
引擎：1796cc直4DOHC機械增壓
馬力：163ps/5500rpm
扭力：24.5kgm/3000rpm
傳動：5前速半自動波，後輪驅動
懸掛：（前）三連桿（後）多連桿
制動：（前）透氣碟（後）碟式（ABS）
尺碼：4535×1730×1425mm
軸距：2715mm；車重：1520kg
輪胎：（前）225/45R17ContinentalSportContact2
（後）245/40R17ContinentalSportContact2
0-100公里：9.7秒；極速：227km/h
平均耗油：10.4km/L
新車售價：$319,000起
車輛提供：仁孚行（28957288）

■新車加裝有SportsPackage跑車化懸掛及制動裝備，大大強化行車嘅操控感。