馬圈才子余伯樂告別梅艷芳，撰一輓聯曰：
艷彩別塵寰暗香疏影成追憶
芳音遺後世金曲勁歌已惘然
寫得幾好，「金曲勁歌已惘然」更寫中四十歲一代（余伯樂只係大梅艷芳兩三年）嘅心事，聽慣梅艷芳、張國榮、林子祥……等等嘅金曲勁歌，現在真係惘然惆悵。
女人壽命平均有八十歲，梅艷芳只係活得一半，令人痛惜。披圖梁（梁柏濤）為佢本新書《令你震驚的健康真相Ⅱ》寫序，寫寫吓驚聞梅艷芳逝世，甚為傷感。因為（一）梅艷芳初出道時好崇拜西城秀樹，披圖特登搵佢做西城秀樹歌迷會副會長，等佢有機會接近偶像，後來梅艷芳嘅台風甚受西城秀樹影響（張國榮亦然）；（二）披圖十年來猛咁宣揚正本治療，教人重視健康，增強免疫系統，但偏偏披圖嘅娛樂圈好友在○三年因癌症逝世。
披圖本新書，由陶傑寫序云：「音樂是感性的專業，醫療卻是理性的行業，梁柏濤不僅在音符的王國裏指揮過千軍萬物，也在疾病和藥物的宇宙裏俯仰自得。」披圖第一本書《令你震驚的健康真相》一出就賣斷市，不斷再版，成為○三年嘅暢銷書，有見及此，於是再斬四両，將健康專欄文字結集出版第二集，講述種種保健免疫避毒之道。唉，如果佢唔係忙成咁，有時間向娛樂圈啲朋友推廣佢嗰套，或者我哋唔會覺得暗香疏影成追憶，金曲勁歌已惘然。