男子組合Boy'Z同女子組合Twins噚日去到西九龍中心舉行簽名會，現場大約有近五百名歌迷到場，佢哋唱唱吓歌重走咗落台派利是，非常熱鬧。佢哋四個都不約而同着咗一套好有新年氣氛嘅夾乸衣，不過Kenny嗰套衫好似唔係咁啱身，size細咗少少，搞到佢有少少下體現形。有個男歌迷見到後，重好不雅咁話佢「大×」。
事後佢經理人霍紋希（Mani）話因為Kenny套衫本來唔係做畀佢嘅，所以個size細咗，先會出現咁嘅情況，至於有歌迷說Kenny「大×」，Mani重好抵死話大好過細。
另外，適逢年卅晚係鍾欣桐（阿嬌）嘅二十三歲生日，好拍檔阿Sa（蔡卓妍）就會負責做搞手去約人開生日會。問到阿嬌會唔會請佢兩個緋聞男友余文樂同陳冠希出席生日會，佢就話就算請佢哋兩個都未必有時間嚟。
樂壇近年興玩翻炒舊作，估唔到連兒歌亦都趁機會食住條水，好似最近唱片公司出咗張叫《童聲童氣》嘅精選碟，就搵咗路家敏同蔡麗貞玩crossover，將佢哋細個嗰陣唱嘅《小時候》、《小太陽》同《飄零燕》等兒歌收錄其中。馮仁昭細細個都係聽呢啲歌大，𠵱家聽番自然勾起唔少回憶。
歐陽震華噚日喺深水埗為無綫新劇《鴨寮下的金蛋》開工，問到佢知唔知容錦昌企圖燒炭自殺，佢話：「點解呀？我以前都有同佢合作過，不過冇乜聯絡。係咪去燒嘢食咋？有乜證據先，唔通我喺車度瞓着咗又話我乜（指燒炭自殺）呀？」但馮仁昭聽聞容錦昌一個人漏夜轉咗幾間酒店，又去便利店買炭，真係十足十自殺咁樣喎。
孫燕姿日前出席舊同事嘅婚禮，雖然個同事已經離開咗間公司，但佢一樣畀面，重喺婚禮上面玩新郎新娘，完全唔理自己係藝人。事後佢話：「她是我的同事時非常照顧我，所以我特別來參加她的婚禮。」馮仁昭見孫燕姿喺婚禮度玩得非常投入，唔通佢唔驚自己結婚嗰日俾人玩番轉頭？
