無綫前晚喺將軍澳電視廣播城分別錄影兩集《勁歌金曲》，其中一集嘅嘉賓歌星係陳慧琳（Kelly）、余文樂同李逸朗等，明顯係用偶像掛帥；而另一集就請嚟一班前輩歌手，好似威利、陳浩德、蘇珊同曾航生咁，可惜唔係玩crossover，如果唔係效果應該幾有趣。
我馮仁昭前晚喺化妝間發現咗一啲好有趣嘅現象，就係前輩同後輩歌手嘅分別。兩批人除咗各據一方之外，化妝風格亦明顯好唔同，尤其係曾航生畫咗一對王小虎咁嘅粗眉，黝黑嘅眼線，塊面重搽到成個白面書生咁，啲粉係厚到可以鑲晒入佢凹陷嘅暗瘡窿度，令佢塊面平滑到不得了，化妝技巧神乎其技。
而同曾航生拍咗拖十年嘅梁安琪前晚亦有在場，佢以前做過DJ又做過區議員，雖然家陣圓潤咗，但有愛情滋潤嘅佢，依然神采飛揚。梁安琪話佢男友就快復出出碟，自己亦會順便復出，做男友嘅經理人之餘，重會接觸番娛圈嘅工作喎。
而同場嘅威利同陳浩德就做咗篋神，行到邊都會夾實個公事包，問威利係咪袋住啲金條喺身？佢就話公事包入面只係放咗樽水，防口渴喎。
蘇有朋𠵱家喺上海拍緊劇集《楊門虎將》，佢話農曆新年得一日假放，本來想攞多幾日假返台灣陪屋企人，但又唔成功，所以要阿爸阿媽同細佬齊齊去上海同佢一齊過年喎！上年佢分別封咗六位數字嘅大利是畀父母，問佢今年會唔會多過上年，佢就笑笑口話係秘密。
葛民輝噚日去尖沙嘴出席《英格蘭足球四強球會系列》影碟宣傳記者會，原來佢有份做《英》嘅主持人。阿葛一講到波就手舞足蹈咁話：「其實我好細個就踢波，中三就參加校隊打龍門，我記得嗰一次我重見報，不過第一次見報好唔開心，因為份報紙寫錯我個名，話我係萬民輝，完全唔值得回憶。」
張惠妹喺嚟緊嘅農曆新年會返家鄉台東參加豐年祭，佢重自掏腰包用咗二百萬新台幣（約四十六萬港元），將成個慶典過程拍成紀錄片。阿妹話佢幾乎每年都會返老家參加豐年祭，但今年對佢嚟講意義特別大，因為今年嘅聯合豐年祭係十年先搞一次嘅，加上今年由佢家族嘅泰安村主辦，所以阿妹先會咁大手筆。
