有讀者問猴年開工吉日，於是託人搵易學會傅會長求教，據傅會長指示：過往幾年嘅年初四都不宜開工，偏偏政府冇得揀，一定要喺年初四開工，故此好唔掂。今年又如何呢？傅會長話年廿八（一月十九日）好適宜食團年飯（是日晚上全係吉時㖭）。年初一子時丑時係凶時，寅時、卯時（即三至七時）係出街好時間，如果未瞓醒，十一時前出街拜年都唔錯。
年初二係歲破日，諸事不宜，食開年飯，提前到年初一晚九點半至十一點比較好。
開工咯喎，傅會長指點假期後第一日，年初五朝早開工都幾好，冇有怕。但如果可以有得揀嘅話，最好時間係年初六早上九點前或者中午食飯（一時前）前。假期大把嘅話，可遲到年初九（一月三十日）早上，不過肖虎者除外。
開工也者，並非立即開動機器，揸枝筆寫字、開收銀機、啟動電腦、用濕布抹枱，動動「好氣」，特別有好效果。
無論揀甚麼時日開工，傅會長特別吩咐：立春（二月四日戍時晚上八時後）之後全年，五黃凶星入中宮（中央位置），易生腸胃、嘔吐病，凡廳心（中央）、房心位置，皆不宜動土、修理天花，二月四日至三月三日，二黑星亦入主中宮，兩凶星重叠，更不能動。請大家注意。至於全年大運，傅會長話由於立春之後行八運二十年，利東北，啱啱有飛鵝山照住，夠氣勢，○四到○七年都會好，○五年更加大旺。