楊紫瓊事業成功，同時亦是一名顧家的女孩，每年父母生日，她都盡量與他們一起度過。感情方面，男友鍾再思除與她一起在事業上拼搏，閒來又會煮幾味博伊人歡心，楊紫瓊表示不在乎一紙婚書，卻想生兒育女。
楊紫瓊和男友鍾再思（Thomas）感情穩定，又是合拍的工作夥伴，她可有考慮結婚？她說：「我冇諗結婚，我覺得兩個人喺埋一齊最重要係溝通同埋互相尊重，一紙婚書唔代表啲乜嘢，我亦唔需要呢啲嘢，最緊要兩個人一齊開心，互相支持同分享。」
一般女孩最渴望的，除了嫁個好老公，就是生BB，楊紫瓊不在乎一紙婚書，卻想到生兒育女，楊紫瓊說：「每個女人都會諗生BB呢個問題，男人又會想有自己嘅仔女，對我嚟講呢個係緣份，冇得強求，生BB責任好大，有時我會諗自己都未照顧到自己，點照顧BB？而且為咗BB要放棄好多嘢，生咗之後，就算細路仔大個咗，都永遠想照顧佢。順其自然啦，如果有咗，我一定會生，但冇亦唔緊要，反正我已經有好多契仔契女，我細佬生咗四個，最細嗰個得五個幾月大，所以乜嘢階段嘅BB仔我都有得玩！」
楊紫瓊對廚藝一竅不通，幸好男友鍾再思喜歡下廚，不時整幾味𠱁女友歡心。楊紫瓊說：「Thomas好叻煮嘢，牛扒、雞，樣樣都煮得幾好食，佢因為鍾意煮嘢，當烹飪係一種藝術，我就好幸運，可以坐享其成。我好幾位女朋友嘅老公都鍾意煮嘢食，好奇怪𠵱家多數係男人鍾意下廚，好似李安、吳宇森、周潤發，佢哋全部都煮得好叻。
楊紫瓊續說：「我由細到大都唔熱衷入廚，以前喺英國讀書時，迫不得已都識得煮幾味，返咗東南亞就唔再煮，周圍都有好嘢食，好方便。我好鍾意食，尤其返大馬屋企，一日可以唔停口咁食足六至八餐，所以我返親屋企都會肥，不過一開工做嘢又好易瘦番。」
採訪：張止寒
攝影：陳慧安
化妝：KamenLeung（ILcolpoTripleEdge）
髮型：RickyKook（ILColpoTripleEdge）
服裝提供：BottegaVeneta
場地提供：邀月
