女子足球嘅受歡迎程度一直追唔上男足，國際足協會長白禮達於是諗出奇招吸引球迷。佢話如果女足球員可以着得更女性化咁比賽，例如好似女排球員咁着緊身衫同熱褲咁性感，相信一定有更多球迷捧場。
白禮達呢番言論，引起好大迴響，女球員話佢嘅建議性別歧視，又話如果球迷淨係想昅女，不如買本《花花公子》好過。
最抵死嘅，就係更有人話白禮達啱啱婚姻觸礁，同後生佢廿幾年而結咗婚唔夠兩年嘅太太離婚，可能係咁儍咗，講出咁失身份嘅嘢。
我求大俠覺得白禮達唔係冇point，當然，我亦唔主張女球員露肉，不過，都唔一定要着闊袍大袖嘅男裝波衫比賽係嘛？好似今屆女子世界盃嘅挪威同瑞典咁，着住稍為收身嘅波衫，又真係美感大增噃！
小董戰比甲未必啱
費格遜日前首次開腔話董方卓要喺英超立足，先學好英文，唔單止生活上英語，最重要係球場上英文術語，同隊友溝通。不過，董方卓首季外借比利時安特衞普，我求大俠就質疑比利時足球術語同英國唔同，咁董方卓學成返英格蘭時，咪係又要重新學過？
沙賓守得雲開
記得當日瑞典門將沙賓加盟阿仙奴時，一直因為施文保持水準，頂住其上位機會。雖然今季雲格又搵咗列文返嚟坐正，但已離隊嘅施文，輾轉都畀番個機會沙賓。因為施文最近玩退休，曼城就撬走韋斯咸嘅占士，而韋斯咸就同阿仙奴借咗沙賓一個月返去做正選，都咪話唔蹺！
網上直播大陣仗
周日意乙上演巴里對巴勒莫嘅雙「巴」大戰，話晒都係南部大戰，喺意國頗為矚目。據講巴里唔單止減門票價錢吸引球迷入場打氣，重會喺官網播呢場波，認真大陣仗。雖然我求大俠唔知佢哋網上播波係咩料，有興趣到時可click入asbari.soccerage.com睇睇。
積遜坐火箭懷斯翻艇
NBA係年輕人嘅天下，老兵唔單止好難搵到好歸宿，而且隨時俾人飛。好似老將懷斯咁，加盟快艇唔夠三個月，噚日突然俾快艇踢走，搞到臨老無處落腳。另一老將馬克積遜就較好彩，俾爵士飛起後，前日搵到火箭收留，做法蘭西斯嘅後備，不過唔知幾時又可能俾人踢走？