楊紫瓊是國際巨星，片酬相當可觀，但她卻選擇與男友鍾再思投資拍片，而且拍的都是大片，以《飛鷹》為例，投資達一億二千萬港幣，雖然現時電影巿道有復甦迹象，但亦相當冒險。
對此楊紫瓊說：「係呀，壓力大㗎，不過投資拍片當然想收穫好，除咗錢之外，滿足感亦大好多，投資拍戲係一件長遠嘅事，唔可以短視，當然我哋亦會睇巿場，睇準先開，電影係一種生意投資，當然有risk（風險），唔會有guarantee（保證），冇人估到結果，呢個亦係電影好玩嘅地方，整個拍戲過程係一種樂趣，研究劇本時，大家都有自己嘅意見，但大家都係想套戲好。」
有傳《飛鷹》嚴重超支，楊紫瓊說沒有大家想像中嚴重，她說：「當時面對沙士問題，如果停咗廠景，就要cut李冰冰戲份，但係我哋覺得佢好啱做呢個角色，討論咗好耐，最後寧願成本貴啲，都要保留佢嘅戲份，最後超支百分之十，但係以咁大嘅投資嚟講，超支百分之十都算好合理。」