西片戲名好鍾意用「豪情」兩字，好似《盜海豪情》、《終極豪情》，全部都係熱血男兒加「警賊」故事；不過港式《豪情》，卻是另一番解法！因為尾後好似永遠都會同「夜生活」掛勾；今個星期新返嘅《豪情》DVD，導演陳慶嘉話明劇中情節，好多重係源自真人真事，簡直儼如港版《性書大亨》故事。
記者、攝影：朱崇德
以色情出版事業為拍片題材真係唔多，在港產片中更屬少見，因為佢就好似「社會禁忌」一樣，象徵着「罪惡」，是社會陰暗面，但又切切實實地存在着。本片最大噱頭之處，係導演兼編劇嘅陳慶嘉講明，劇中有不少章節係源自真人真事，可以看成是港式《性書大亨》！
故事內容，主要講述漫畫編輯阿忠（陳奕迅飾）同Andy（古天樂飾），因工作的出版社倒閉，同告失業。他們和三個同事決定投資出版鹹書《豪情》。該書以佢獨創嘅指南式消費導向報道手法，一出街就賣斷市，阿忠和Andy的性幻想亦因此得到實踐，並令沉寂一時嘅鹹書界翻生，他們成為淫業的英雄；可惜他們的價值觀改變了，身邊的引誘又太多，令他們原本穩定的感情生活也受到考驗……
筆者都問過好多《夜生活》版同事，佢話睇《豪情》時，真係有一份莫名嘅認同感，儘管有少許誇張，不過就色情出版業的發展骨幹，都未至失實，而且劇中主角Andy，重有幾分似行內一位「爺」級前輩的真人故事！
電影一開場已經拍得非常有聲有「色」，近百位無上裝日本AV女優，伴住古天樂呢位性書大亨，講述佢嘅發迹故事；儘管古仔演技有啲木，不過咁Grand嘅場面，港片真係幾許見過？至於Eason就剛好相反，帶個粗黑框眼鏡扮木獨，但骨子裏嘅放，同誇張式漫畫演技（雖略過火），真係引發唔少笑料！必睇係Eason同骨女何超儀一幕，兩個人邊玩「冰火」邊談心，睇見Eason做到七情上面，雖然知道係假嘢，但都真係好好笑！
另外，谷祖琳所扮演嘅鳳姐亦是一絕！起初兩男上去時，谷個「鳳樣」真係烏「Wear」到嚇親人；不過谷扮鳳姐嘅演技，真係入型入格到好似《金雞》裏面嘅吳君如！及後谷發迹成「一樓一鳳女神」，亦是《金》式笑料！
本片另一個特色，就係配角非常搶鏡；劉以達嘅黑幫龍頭勁爆笑，講嘢都講唔清反而搵古、E出嚟講數，完場時重有佢嘅特寫蝦碌片段，比原劇本重要搞鬼，大家記住唔好咁快熄機！
全片高潮笑位，係田雞扮馬伕一幕，反教兩個男主角甚麼是色情事業Marketing，同勁屈兩男白畀肉金錢！幾個人對答間，大家都係笑笑口，但字裏行間就句句粗口，睇完《豪》後大家會驚訝香港明星在這方面嘅高深造詣！
講真！故事以色情出版事業為題材，又標榜係真人真事，所以加入一啲三級鏡頭，同粗口對白都算無可厚非，可幸是整體樂而不淫，不至流於低俗；不過全劇敗筆，是請嚟日本AV人氣女優小室友里來港一段，劇情只講佢喺巴士上兜吓風，真係全無戲份可言，除咗係增加噱頭之餘，感覺真係有啲為性感而性感！
