其實潮流呢樣嘢講得難聽啲就係翻炒，見型人着乜，你又跟住着乜囉。好似經常被利用嚟作首飾同衫褲圖案嘅骷髏頭，只見木村拓哉又戴、中島美嘉又戴，卒之最近日本街頭興到成行成市，日本雜誌紛紛做特輯溫故知新㖭。
查實我羅拉上年見木村去上海拍《2046》時，次次出現總有一件骷髏頭喺身上，就同大家講過木村嘅新boom，好快就會變成潮流。果然，同佢好鬼老友嘅中田英壽、同埋SMAP嘅隊友香取慎吾同草囗剛喺上月尾「紅白歌唱大賽」時，都係你戴一條骷髏頭手鏈，我着一件同圖案外套咁出場，齊齊玩rockfeel。
而女中豪傑中島美嘉做代言人嘅日本品牌nexo，都即刻出番啲同樣logo嘅衞衣應市。
咁戴還戴，乜牌子出嘅骷髏頭產品最hit？自認為「skullfreak」嘅新紮哥仔塚本高史，就提醒大家CRAZYPIG同DARKPLOT嘅產品，貴得嚟勁受追捧，佢話：「CRAZYPIG啲錢包閒閒地都要四十萬yen（約二萬幾蚊港紙）㗎，不過鍾意起上嚟冇計！」