唔經唔覺就快過年，睇番羊年，伏勝嘅收穫都算唔錯，尤其好幾隻揸咗一年嘅股仔，冇花冇假升咗一倍，奈何伏勝唔鍾意將啲錢全數買落一隻股度，如果唔係收穫就和味。
國企指數喺前一個星期開始下跌，好似煞唔到車咁，幾隻原本被一致睇好嘅股票，一跌就唔見咗一大截，搞到好多諗住趁低位執平貨嘅散戶，臨埋年都被迫要做人哋嘅「兼職財神」，就好似隻中國石油（857），當跌至4蚊樓下嘅時候，沽盤好似源源不絕，令到班接貨嘅散戶接到手軟。
之前曾對伏勝話隻中石化（386）重有得跌嘅朋友，喺上個禮拜五收市時，好得戚咁問伏勝有冇貪平追貨而中伏，佢話隻中石化跌到去3蚊左右應該差唔多，皆因上個星期四、五兩日，隻股嘅成交係跌市中開始縮減，鬼子佬沽盤亦收斂咗，佢重話如果下星期有3蚊樓下嘅話，可以吼吼。
記得以前阿媽教落，過新年千祈唔好買幾樣嘢，其中一樣就係鐘，因為同個「終」字同音，買「終」對中國人嚟講係唔吉利，不過對於馳騁股場嘅炒家嚟講，做鐘表業嘅宜進利（304）就一定要留意。有朋友話呢排宜進利動作多多，首先就係為咗配合CPEA而喺香港開設兩條生產線嚟攻國內市場，又計劃喺國內擴建廠房，做咁多嘢無非都係為咗搞好個門面。聽講佢哋將會喺短期內搞個歐亞之行，向兩地芬佬推介佢哋隻股票，雖然宜進利股價已經由1蚊升到上嚟個半附近，但由於有國內龐大市場作後盾，股價食住個升勢向1.80元進發都唔係冇可能，個朋友話，有機會不妨喺個半樓下買啲嚟擺過年。
伏勝