楊紫瓊今個新年馬不停蹄宣傳新片《飛鷹》，所以未能回馬來西亞探望在她生命中排第一位的父母，幸好父母向來體諒她的工作。
楊紫瓊說：「我聖誕節返過去陪佢哋，所以爹哋媽咪唔會投訴嘅。屋企人永遠喺我生命入面排第一位，我好享受同屋企人一齊嘅時間，見到屋企人就覺得好舒服、好溫暖。
「爹哋媽咪亦唔會計較係咪大日子或者大節日，只要可以一齊，大家都好開心。不過我好緊張佢哋嘅生日，我覺得生日最好一齊過。最記得拍緊《臥虎藏龍》嗰時，返唔到去陪爸爸慶祝生日，我約埋發哥發嫂（周潤發夫婦）一齊，喺電話同我爹哋唱生日歌。」
朋友在楊紫瓊的生命中亦很重要，她大部份的好友都是圈外人，梅艷芳則是她圈中少數要好的朋友之一，阿梅生前更點名要求楊紫瓊替她扶靈。阿梅去世後，有不少是非傳出，對此楊紫瓊說：「我相信阿梅身邊每一個人，都係為阿梅好，唔會有乜嘢居心，最重要係阿梅去得平平安安，同埋開開心心。」
楊紫瓊續說：「有好多朋友，我已經當咗佢哋係屋企人。我好幸運，喺香港拍戲識咗好多朋友，反而電影界嘅朋友就唔係好多好close，可能我性格比較低調，當然做宣傳時又可以好高調啦。」