響今屆北美國際車展上，福特車廠展出咗被譽為係新一代旗艦級車系嘅FiveHundred；新車賣相可謂極具豪邁氣派，車身線條流暢之餘，一對炯炯有神嘅大燈，襯以附有電鍍框邊嘅闊大鬼面罩組合，既突出又吸引，車身兩邊重有電鍍邊作配襯㖭！
由於軸距長達2867mm，故此能為乘客營造出一個寬敞闊落嘅車廂空間，加上前後兩排承托力甚豐嘅座椅，以及車廂四周嘅桃木修飾，望落氣派十足；設備配搭又見齊全，兼且重備有多個安全氣袋，以確保車上乘客安全㖭！另外，新車又以一台經過改良嘅3.0公升V6偈作核心，動力輸出高達200匹之餘，廠方更為其安排有6前速自動波及CVT自動波，以迎合不同用家需要。唔知香港嘅車迷，有無機會與之見面呢？