下個星期四就係甲申年年初一，但正式算法，甲申年立春之日係二月四日十九時五十七分，立春之後先至係猴年。立春嘅八字就係甲申年，丙寅月，癸丑日，壬戍時。
去年一月十九日，本欄講癸未羊年立春，話明羊年唔會曳過馬年，但係要勤力去捱。𠵱家事後孔明，羊年上半年真係捱到七彩，八月之後先至一片順境，人心向好，全年嚟計，仍然好過馬年（○二年）。明年又點睇呢？立春八字之中二木二水二土一金一火，金木水火土齊全，正月癸日，用神辛金丙火。
據《窮通寶鑑》云：「正月癸水，其性至柔，先用辛金生癸水之源，次用丙火照暖，名陰陽和合，萬物發生。」咦，睇真吓，丙寅月噃，丙火有根（寅木），夠晒照暖癸水之用，可惜八柱之中，辛金不顯。幸好有丑土戍土，丑戍內藏辛金，有得救，而且申金內含庚金，亦有生水之用，故此綜合而言，立春日之癸水，雖然唔係A級，亦算B級以上，主衣食豐足，無大富大貴。
羊年比馬年好，猴年照睇亦一定比羊年好，大家有安樂茶飯食，一天光晒，但因為年柱、日柱、時柱都係地支剋天干，俗語話以下犯上，民與官爭，睇嚟經濟雖好，政治社會爭拗難免，啲高官會好唔得閒。個人嚟講，乙木命（即係乙日出生之人）得到強癸滋潤，生機盎然，其他以癸水為用神嘅人士，亦會好景。啱唔啱？○五年一月尾再寫。