挨年近晚，好多炒家已經準備過年，不但唔再買股票，部份重沽貨套現過年，之前港股鑊氣甚猛，但近日氣氛明顯轉淡，搞到小初都悶悶地，唔通真係要過埋新年，先至再有得炒？
經紀黃叫小初唔好心急，佢話不如趁家陣市靜，吸納一啲有潛質的股票，費事過咗年之後，先至同人搶貴貨，例如民企股大成生化（809），可以作為收集對象之一。
噚日唔少民企股走勢偏軟，主要受到超大現代（682）批完股復牌，股價急跌影響，大成相對偏硬只回落0.5%，收4.375元，但同歷史高位5元，仍距離一大截。
經紀黃話，大成備受多間外資行垂青，久唔久都會幫大成出吓報告推介。聽聞過咗農曆年之後，會有一間歐資大行幫大成搞一場午餐推介會，基於呢個原故，買定些少過年都無妨。
另外，萬眾期待的銀建（171）終於復牌，雖然成交量好大，但表現並唔係傳聞中咁勁，最後平收2.15元，令唔少捧場客失望。
慕容小初