恒基連續第二年喺銅鑼灣維園投咗個乾貨年宵攤檔。吸取舊年經驗，今年早有準備，擺咗好多樓盤資料，同今年重頭項目西灣河碼頭廣場嘅模型喺度，重同苗圃行動合作，義賣公仔籌款，幫助國際助學步行籌款活動籌募經費，恒基張炳強話，每隻公仔只係賣五十蚊，兼且買大送細，兩隻公仔分別叫「祥祥」同「晶晶」，配合番個活動。
蘭西記得，恒基舊年擺年宵時諗住擺啲樓盤資料做宣傳，但係政府規定，個攤位要賣乾貨，結果惟有攞啲有恒基品牌嘅鎖匙包嚟賣。今年醒目好多，計劃好義賣公仔籌款，相當有義意。
恒基個攤位位置唔錯，人流應該幾旺，噚日年宵首日開放，佢哋已經準備好晒，用紅色為主，重放咗幾盆桔，現場已經有財神派傳單兼抽獎券，頭獎重有足金金猴。張炳強話，呢個攤位大概用咗三十萬。
蘭西聽講有投資者想買個一手單位，搵埋代理去售樓處同發展商傾，希望可以平些少，點知發展商售樓部員工話，只可以用價單上面嘅價錢賣，點都唔減得，唔係冇辦法同上頭交代。呢單交易傾咗個幾鐘，最後都傾唔成。
𠵱家個市咁旺，發展商唔使減價都賣到樓，所以又開始輪到發展商態度強硬。過去市唔好時，買家埋枱傾，發展商唔止減價，重送呢樣送嗰樣，總之要令到買家覺得抵。但𠵱家已經冇呢支歌仔唱。
樓市愈嚟愈熾熱，投資者開始大舉入市，蘭西聽行內人士講，原來好多大手成交都喺度醞釀緊，唔少優質物業，已經有幾個準買家表示有興趣。佢估計往後會不斷傳出大手成交嘅消息，大家不妨留意吓嘞。大手成交多，對樓市會有指標作用，因為造價可能會比市價高，自然會帶動同類物業嘅價格。
港島東區𠵱家可以賣嘅新盤唔多，最矚目算係太古嘅鰂魚涌逸樺園，舊年開賣時適逢樓市轉勢，所以造價一直有升冇跌。中原吳炳深話，樓盤最後一個標準單位啱啱賣出，一座高層C室，七百九十二呎，售價五百三十八萬八千蚊，每呎六千八百零三蚊，係樓盤同類單位嘅新高。𠵱家逸樺園只係得番三個頂層單位待售。
逸樺園一手單位吃香，二手都好活躍，聽利嘉閣講，二座高層A單位，一千零三十四呎，以五百四十八萬轉售，原業主賺咗七十幾萬。
至於租務，亦剛剛做成咗首宗租務，係一座極低層C室，七百九十呎，呎租二十一個半，計落回報率差唔多有六厘六。
蘭西
電郵地址：