過氣小生生得高大威猛，可惜咁多年嚟都係靠黐女人搵食，以前佢喺電視台入面，有位高層做靠山，但𠵱家冇人撐，就即時洩晒氣。
其實過氣小生一直星運平平，舊時有電視台女高層照住，開親劇都總會預埋佢嗰份，但自從女高層俾電視台炒魷之後，即刻泥菩薩過江，邊可能照顧到其他人，所以過氣小生冇乜劇拍，人工又低，𠵱家惟有黐住啲自由行嘅內地闊太，喺佢哋身上搵番啲油水囉。
𠵱家好多來自內地嘅闊太使錢好豪，過氣小生就睇中呢點，成日同啲闊太跟出跟入，而為咗遷就啲客，平日油尖旺一帶就變成佢嘅蒲點，早排馮仁昭個friend喺佐敦區見到過氣小生，同個中年內地阿太行街街，佢重幫對方攞手袋㖭！
過氣小生𠵱家已經步入中年，髮線開始向後移，佢咁大個人應該為自己嘅事業着想吓，重靠黐女人，真係令人欷歔！
台灣東風電視台節目《亞洲娛樂通》，上星期本來請咗蕭亞軒做臨時主持，後來佢竟然甩底，惟有由組合Tension頂上。有傳因為蕭亞軒扮大牌，要求同王力宏或者陶喆做拍檔先肯做，如果係嘅話，馮仁昭覺得佢好冇信譽囉！不過蕭亞軒嘅經理人解釋話蕭亞軒嗰日肚痛，所以甩底喎！
林熙蕾農曆新年將會喺攝氏零下二十度嘅瑞士度過，因為佢同網球名將古妮高娃接受歐米茄名表嘅邀請，為瑞士中部舉行嘅「世界雪車決賽」做嘉賓，頒獎畀車手，佢哋屆時會坐時速高達一百二十公里嘅雪車，享受雪地奔馳嘅速度感。
林憶蓮同倫永亮噚日去商台接受訪問，倫永亮自爆一直都唔知可以用電話傳短訊，直至有一日佢做騷之前，收到憶蓮send咗一個寫住「goodshow！」嘅短訊畀佢，之後先至識用呢樣嘢。馮仁昭都覺得佢有啲out！而憶蓮就話每次見到倫永亮，都好想搣佢塊面喎！
賀歲片《鬼馬狂想曲》同《魔幻廚房》前日上映，《鬼》片首日票房一百零四萬八千領先，而《魔》片就收八十四萬，張栢芝噚日對於票房報捷表示好開心，問佢第一仗贏咗鄭秀文有乜感想？佢就話邊個贏、邊個輸唔重要。馮仁昭覺得栢芝喺戲內扮林亞珍，都係一個新嘗試。
利嘉兒噚日喺銅鑼灣出席宣傳活動，佢為無綫主持嘅《笑談普通話》第一同第二輯都好評如潮，但無綫播完呢兩輯之後唔考慮添食。利嘉兒話：「因為老師形象，好多其他工作我都推咗。我遲啲會做婚紗代言人，不過最恨拍化妝同護膚品廣告。」利嘉兒話今個月約滿無綫，但已經續咗新約。佢咁受公司器重，馮仁昭都戥佢開心！
