雖然話股市的功用是用來集資，但近排上市公司的抽水活動，簡直是如狼似虎，真係好易嚇親人。恒地（012）3個半月內兩次大抽水，投資者原本冇戒心都變得有戒心，睇見升得多的股票都擔心會抽水，認真破壞氣氛。
滙豐（005）連日調整，好友雖然冇被大笨象壓扁，但其實都頂得好辛苦，恒指昨日再跌82點，收13167。恒指全周下跌218點，跌幅1.6%。
恒指周線圖似營造旗形，可能有三幾個禮拜整固，但滙豐50日線在120元水平，如果獲支持反彈，恒指可能跌至13000附近已經跌唔落，甚至大戶趁農曆年長假前交投疏，反手挾一轉淡倉，所以現時勿心急造淡。
昨日市場氣氛轉差，倉內多隻股票都觸及計數位，華豐（364）尾市無法抽回0.99元之上收市，決定唔睇業績先計數，沽貨價0.98元，較買入價仍有7.7%利潤。興業（480）在3.025元沽出，較買入價2.925元只有3.4%利潤；蜂林在1.10元沽出，則有1成利潤，尚算理想。
其餘冠軍（092）、粵啤（124）及權智（601）仍守在計數位之上收市，按原定部署繼續持有，但觸及計數位亦會沽貨。
趙飛雲