有睇開意大利波都會知道，今年最紅嘅球星必然要數托迪同尼維特，當選今年意大利最佳球員，佢哋雖然分別效力兩間球會，要見到佢哋同隊作賽，亦非難事，因為SEGA最新街機育成足球遊戲《WORLDCLUBChampionFootballSERIEA2002?003》（《WCCF》）已經正式抵港，香港機迷就有機會成為教練，將托迪同尼維特呢啲當紅球星收歸旗下，一嘗成為香港納比嘅滋味。
記者：許福合
攝影：陳偉強
ImageGirl：小惠
鳴謝：GameWatch
其實《WCCF》上年年尾己經喺日本有得玩，自推出後就一直橫掃日本機舖，將大量J-League球迷引入機舖長期駐紮，《WCCF》之所以有咁大號召力，除咗因為SEGA名牌效應外，更將其名作《育成球會》嘅玩法引進《WCCF》，玩家可以親自訓練球員，下達作戰指示，過足領隊癮。
首批《WCCF》已經有23部抵港，每部可供8人同時作賽，相信繼跑馬機後，又會再掀起街機熱潮。
《WCCF》最特別係引入卡Game元素，球員都會以卡片作代表，並以02-03年意甲為基礎，共有340名球員，最過癮重係全部會以真名出場，按能力分成5級，白卡為普通球員，黑卡為球星，之上重有世界級球星同意大利國家隊，不過最罕有都要數最高級嘅SerieALegend，收錄咗曾經踢過意甲嘅球星，擁有超高能力值，而且各懷絕招，非常搶手珍貴，喺日本，球王施丹卡就炒到上4萬日圓（約港幣$3,000）亦有買家。
一隊球隊最重要資產當然係球員，要建立最強球隊，好球員絕對唔可以缺少，開始遊戲之前，就先要花$70買一個StarterPack，當中包括貯存球隊資料嘅IC卡，另外還有11張白卡球員作為球隊班底。
《WCCF》主要踢意甲，除原有18隊意甲球隊，再加上玩家及電腦原創球隊共20隊比賽。比賽時玩家可利用球員卡編排出心水陣容，如排出3-4-3或4-4-2陣式，電腦更會自動追蹤卡片位置並反映喺遊戲當中。要令球隊強大，不外乎訓練同加入球員，因為遊戲之初，玩家只有一堆白卡，訓練成果有限，除咗靠換卡外，每次比賽後都有機會抽球員卡，話唔定可以抽到亨利、中田英壽等球星！
雖然一開始遊戲只有白卡，不過《WCCF》出黑卡嘅機率都好高，大約玩6?鋪至少會出1張，黑卡球星能力較高，綜合能力可以高達90以上，而一般白卡只有60?0分，拎多幾張黑卡球員可大幅提升球隊嘅攻守能力。靈活運用戰術亦好重要，例如角球時可將中前場球員卡推近敵方龍門，亦有助己隊爭取入球。
一向有玩開SEGA隻《育成球會》，《WCCF》系統相似，同樣需要訓練球員、決定戰術排陣，所以好容易上手，難度唔高。新手記緊要做足準備工夫，如強迫偏左球員打右邊會有反效果，所以要留意每個球員適合嘅位置，決定球隊採用嘅陣式。
玩咗一日，已經有二十幾張卡！起初覺得要用$70買StarterPack，然後先有得玩，好似幾貴，但見到啲球員卡設計都唔錯，幾靚，可以當作球星卡收藏都算值得。玩落覺得同《WinningEleven》幾似，但操控就冇咁麻煩。
機種：街機
生產商：SEGA
遊戲類型：SLG
玩家人數：1?人
價錢：$15（$25兩局）
官方網址：