繼全新Mazda3及RX-8之後，日本萬事得車廠又響今屆北美國際車展（NorthAmericanInternationalAutoShow）上，展出咗一款名為MX-MicroSport嘅概念車；此車造型獨特吸引之餘，就連車廂鋪排亦滲透着濃厚嘅跑車意識。
於車展會場上展出嘅全新萬事得MX-MicroSport概念車，廠方特別為其安排一個跑意十足嘅造型，除有雙出式跑車尾喉之餘，重有大型17吋多幅式跑車合金胎軨，以及專用紅色車身顏色作配搭㖭！試問係跑車Fans嘅你，又點可以抗拒呢份誘惑呢？
雖然以尺碼而言，MX-MicroSport嘅長度，比剛在港推出嘅Mazda3五門版，來得較短（只有3980mm），但闊度及高度卻較後者為多，故此能為車上乘客，帶來寬敞闊落嘅乘坐空間；車廂鋪排亦見跑味十足，其中前排一雙仿桶形座椅成此車賣點外，內裏嘅金屬面板裝飾，以及透出紅光嘅表板，從而顯現出一份叫人難以抗拒嘅魅力。
廠方特別為呢部概念車，裝上一台全新嘅2.0公升MZR引擎，動力輸出充裕（馬力：148ps/6500rpm，扭力：18.7kgm/4500rpm）唔在講，而且又見運轉寧靜，同埋重有低廢氣排放，及低耗油量嘅特性㖭！與此同時，由前輪麥花臣支柱，以及後輪扭力連桿所組成嘅懸掛系統，喺剛勁有度嘅底盤輔助下，更能為車子帶來唔錯嘅路面循迹性呢！