前基本法起草委員蕭蔚雲同另一位法律專家夏勇噚日喺香港開壇講法，佢兩個有幾多度聖旨要下達，八方不得而知，但係蕭教授出名頑強，肯定會不厭其煩咁向港人灌輸佢嘅睇法。
對於蕭蔚雲、許崇德、吳建璠同埋夏勇四位大陸官方御用學者，老董同詩姐姐都已經同八方一樣尊稱佢哋做「四大護法」，反而煲呔就鬼咁小心，由頭到尾都只係叫佢哋做「法律專家」。夏勇佢哋都好鍾意「四大護法」呢個稱號，認為被稱「護法」代表佢理性一面，重話感到「非常光榮」。梗係啦，專家周圍大把，「護法」就唔同呢，個名聽落寧舍威。
大家都睇到蕭護法噚日惡形惡相，罵港人還甚麼政於民？九七年七月一日不是從英國人手上選政於港嘛？重話莫非六百萬人都做晒特首先高興？
蕭老重鬧埋啲議員，向主要官員提不信任動議係違反《基本法》嘅原意。吓！咁都得？護法口大，港人口細，《基本法》嘅解釋權在人大常委，港人真係拗都無謂。
傳真︰2623-9278
電郵︰