美國小天后BritneySpears，上兩個星期同鄉里積遜（JasonAllenAlexander）單結婚醜聞，搞到做咗全地球嘅笑柄，不過事後好多人問，點解積遜咁大方，肯即時同Britney申請婚姻無效呢？噚日有報紙就爆料，原來Britney畀咗成四百二十萬港紙過積遜做掟煲費㗎！
據二五仔爆料，Britney今個月三號凌晨喺拉斯維加斯結婚之後，第二朝打畀阿媽Lynne報喜，點知Lynne聽到之後激到爆血管咁滯，即刻搵埋大班律師飛咗去賭城。Lynne深知若果積遜同Britney離婚，可能會分佢阿女數以億計嘅身家，所以即刻用銀彈攻勢，利誘年少無知嘅積遜。
據講Lynne一開口就好闊綽咁送四百二十萬港紙畀積遜，Lynne重話如果佢答應唔分Britney嘅身家，佢哋重會掟多十六萬現金出嚟當Bonus喎。
據講積遜起初不為所動㗎，但最終咪又係抵唔住銀紙嘅誘惑，同Britney申請婚姻無效囉！積遜同Britney結婚五十五個鐘就袋咁多錢，維起上嚟就係七萬六千蚊港紙一粒鐘，呢份又食又拎嘅優差，又去邊度搵先？