金價大幅下滑，由每安士420美元急挫至407.50美元，傳聞有大戶開始平倉獲利，今次金價大震盪極可能震散唔少好倉，如果引發大量止蝕沽盤湧現，金價轉弱及美元轉強之勢可能由此而生，對江銅（358）與紫金（2899）大為不利。前日鋼鐵股被質，金礦股亦隨時會跟住插水。江銅剛剛獲得董事會授權配售20%H股，最快下個月可配股，但金價加埋國企股調整，真係時不予江銅。
港股噚日持續調整，收報13167，跌82點，成交219.82億元。
先思行（595）公布，正洽售投資權益畀一名獨立第三者。Cookie話，先思行可能出售手頭15%在韓國上市的Reigncom股權，相信會獲利不菲。Reigncom現價10.82萬韓圜，較招股價4.7萬圜高出1.3倍，先思行所持權益，市值亦由大約458.64億圜，增至1054.87億圜，相當於6.895億港元，重高過整間先思行市值。
地鐵（066）入股深圳地鐵，並且計劃將香港地鐵連接深圳黃崗口岸地鐵站，等於地鐵直入深圳。呢個消息重好過兩鐵合併落實，刺激地鐵股價急升，突破12元水平，收12.50元。
有分析員話，早前地鐵因為本港地產項目押後發展，加上前景有限受到投資者冷落，今次證明地鐵可憑藉其鐵路經驗拓展海外市場，自然令市場對佢另眼相看，要重估地鐵投資價值。不過，地鐵似乎想將成套在港經營模式搬去深圳，呢個如意算盤能否打得響，就要視乎管理層能否掌握國內房地產市場風險，及深圳市政府在車票價格上的控制。
阿虎