早前冇耐賭王何鴻燊喺一個新年公開活動好高調咁話，特首董建華最錯係聽錯一個人嘅說話，結果搞出個「八萬五」，俾個「紅鬚軍師」害死香港人。賭王重話，如果他日呢個紅鬚軍師做特首，佢一定返澳門，而幾十個大商家都會走人咁話；真係好少見有人講嘢咁激。
噚日賭王又再主動放料，話梁振英今個禮拜一親自去拜訪咗佢，而且對八萬五政策解釋得好清楚。不過，梁振英對佢話自己唔係建議八萬五政策嗰位「紅鬚軍師」，幕後黑手另有其人。咁黑手係邊個呢？賭王話：「我同佢（梁振英）講『你都講我知係邊個吖』，點知佢又唔講」。
既然梁振英實牙實齒話自己唔係幕後黑手，賭王都懷疑自己，話「睇嚟我怪錯好人」。既然怪錯人，咁賭王又有冇同梁振英道歉呢？點知賭王嘅回應係：「佢（梁振英）冇saysorry噃，佢話佢唔知吖嘛。算啦，事情都有個了結啦」。
有人傳出梁振英係第三屆特首熱門之一，咁賭王又會唔會支持佢呢？「咁遠嘅事，到時先講啦」。服未？
傳真︰2623-9278
電郵︰