大行出完報告唱淡滙豐（005）後，果然捉住大笨象嚟開刀，昨日再挫1.5元，收121.5元，繼續拖跌大市。
滙豐Put輪好耐都未試過咁威，昨日10大升輪榜上，佢哋佔4件，最巴閉嘅係9159，大升31%，高踞榜首。9159現價3.8仙，溢價16%，槓桿率320倍，今年4月7日到期，是日有近億份輪易手，金額378萬元，有唔少人玩。
單以數據而論，9159揸唔過，快炒一日半日，好彩嘅或有錢賺，揸耐啲嘅話，輸面遠遠大過贏面。9159行使價102.5元，壽命得兩個半月，要正股喺到期前跌足19元以上，隻輪先至開始有價值。老友，𠵱家係牛市，你話滙豐喺兩個半月內大跌1成6嘅機會有幾大？
其餘3件上榜滙豐Put輪，9212數據一樣唔得實際，9314同9279好些少，但值博率亦唔算高。滙豐50日平均線目前在119.8元附近，距離現價只有1.7元；自去年4月尾開展升浪以來，滙豐從未正式跌破50日線，今次就算守唔穩，都有好大機會先行反彈。
海爾中建（1169）昨挫3%，但隻公司輪873由1.1仙彈上1.2仙，跳高1個位就升咗9%。升幅較大係因為輪價太細易誇張，但以數據而論，873根本唔應該升。隻輪下月26日就到期，命短而溢價高達61.2%，槓桿率27.5倍都冇用，到尾9成飲雪水。
章盛