近來電視新聞常常播出一啲大陸的嚇死人事件，例如起樓唔使攞批准、演藝學院學生被迫去實習做小姐、用頭髮做醬油、用漂白水漂食物等。最嚇死人的不是這些事件本身，卻是違法者的回應。還記得那個演藝學院色情院長怎樣回應事件嗎？記得他怎樣「印印腳」，陰陰笑、大聲夾無恥個樣嗎？娛樂圈本是個大染缸，現在只是早一點去實習實習。講嘅人，問嘅人，和聽嘅人都好明顯知道是歪理。咦，感覺似曾相識，好似在城市論壇也見過類似嘅污糟嘢。
一見到四大護法手指指香港我就覺得周身「唔聚財」，佢哋講親啲嘢都好似耳邊風，極之不能入耳，點解呢？人哋係全國德高望重之重量級人馬，莫非是我水平低未達標，所以不能tune到佢哋嘅channel？
前《基本法》起草委員會成員許崇德表示，港人對政改十分焦急，對《基本法》二十三條國家安全立法卻毫不焦急，他不理解。梗係不理解啦，一個小六全級考第一的學生，喺度手指指話一個中六學生計加數唔跟step，香港的法治制度和法治精神何止高你幾班！人哋已經用緊微積分的時候，你重講緊計加數要一步一步，遁序漸進咁做先至唔會有錯。
𠵱家有三個中六學生，新年後結伴北上，去請教一班小學同學應該怎樣遁序漸進計加數。