當奴北上照肺在即，中方先發制人，派咗「護法」嘅兩名老人蕭蔚雲、夏勇嚟香港，重有一件許崇德，喺北京，着住套睡袍接受有線訪問，大罵香港人，點解立法23條唔急，普選特首就爭搶閘，咁「雙重標準」？
好在我哋當奴收到風，話呢幾個人大護法老人，唔代表中央政府。唔代表中央，即是護法老人，實質係民間人士，若然唔係着件睡袍嚟見客，好學唔學，學當年嘅吾爾開希，好似許崇德呢亭「中央領導人」，此例一開，以後胡錦濤咪一樣可以着睡衣見布殊，溫家寶亦可以有樣學樣，着睡衣同來訪嘅德國總理施羅德一齊傾吓中德人民友誼？
香港人對23條同普選，冇錯，就係雙重標準。玩政治，邊個唔係雙重標準？請問吓許老人：當年外蒙可以由中國分裂而獨立，台灣就唔得，係咪雙重標準？中國收回香港主權話係領土完整，尊嚴神聖，但釣魚台由日本進駐，佢就唔敢收回，又係咪雙重標準？一九六七年暴亂首領楊光，得到董建華頒大紫荊嘉獎，一九八九年六四和平示威嘅領袖王丹、吾爾開希，就要遭受通緝，咁又係咪雙重標準？
一國兩制，大陸人民唔准隨便來香港，香港人就可以隨時回大陸，大陸人民可以當兵，香港人就冇，咁係咪雙重標準？
冇錯，對待23條，同普選特首，香港人就係雙重標準，咁又點？
許崇德問得出一啲咁幼稚嘅問題，咁都做得「專家」，唔怪得溫總訪美時話，中國人民教育素質低下咯。
香港人有訴求，五十萬人示威，向全世界講得清清楚楚。國際友人紛表同情支持，連美國商會主席都敦促呢個冇乜人氣嘅董班子，應加快民主步伐，按照基本法，推行政制改革，咁樣就會幫到營商環境。
許崇德，你聽到未？護法四老，老就大晒？老而橫蠻，老而懵董，老而毫無進步，就變為阻住地球轉嘅反動勢力。人大護法四老，職責係聽港人嘅訴求，如果聾聾哋，好似阿董咁，就應該搵針灸師，篤幾個穴位，開吓竅。
講開一個聾字，原來大哥成龍，榮獲理工大學頒授「名譽教授」。成龍多次曾經自稱讀書少，咁都做到教授，可見唔止係當年中國嘅工農兵人士張鐵生交張白卷，都可以入大學，連香港都可以創造奇迹。
可惜理工大學冇功夫系，成教授唔知教邊一科。不過，𠵱家後生可畏，咪睇小啲大學生，成龍入到課室，都未開口，話唔定佢哋會咪咪嘴笑，閂埋門好多嘢想請教成教授。
傳真︰2623-9278
電郵︰